الماتىدا قوعامدىق كولىكتىڭ قۇنى نەگە كوتەرىلدى - دەپۋتات جاۋابى

الماتى. KAZINFORM - الماتىدا قالالىق ءماسليحاتتىڭ كەزەكتەن تىس XXI سەسسياسى كەزىندە قالاداعى قوعامدىق كولىكتىڭ قۇنىن 120 تەڭگەگە كوتەرۋ شەشىمى قابىلدادى.

الماتى قالاسى ءماسليحاتىنىڭ دەپۋتاتى، قۇرىلىس، ساۋلەت، ۋربانيستيكا جانە جەر قاتىناستارى جونىندەگى تۇراقتى كوميسسياسىنىڭ ءتوراعاسى نۇرسۇلتان شوقانوۆ بۇل وزگەرىستىڭ سەبەبىن ءتۇسىندىردى.

- بىزدە سۋبسيديا رەكوردتىق كورسەتكىشكە جەتىپ وتىر. بيىل تاسىمالداۋشى كومپانيالارعا ءبولىنىپ وتىرعان 97 ميلليارد تەڭگە قىزىلوردا، تالدىقورعان سىندى وبلىستىق ماڭىزى بار قالالاردىڭ بيۋجەتىمەن بىردەي. تاريف پەن سۋبسيديا مۇنداي باعىتتا جۇرە بەرەتىن بولسا، باسقارۋعا كەلمەيتىن پروتسەسستەرگە الىپ كەلۋى مۇمكىن. سوندىقتان ءبىز تاريف باعاسىن بىرتىندەپ كوتەرىپ وتىرۋدان ەشقايدا كەتە المايمىز. بىرىنشىدەن، جەرگىلىكتى بيۋدجەتكە تۇسەتىن جۇكتەمەنى ازايتۋىمىز كەرەك. ءبىراق بۇل شاعىن ءوسىم حالىقتىڭ الەۋمەتتىك وسال توپتارىنا اسەر ەتپەيدى. بۇگىنگى دەيىن كىم تەگىن جۇرسە، ولار ءارى قاراي دا تەگىن جۇرە بەرەدى، كىمنىڭ %50 جەڭىلدىگى بولسا، بۇل جەڭىلدىك ولاردا قالادى. جولاقىنىڭ قۇنى قالانىڭ بارلىق بولىگىندە، بارلىق مارشرۋتتارعا بىردەي. ادام 70 شاقىرىم ءجۇرىپ وتسە دە، وسى 120 تەڭگەنى تولەيتىن بولادى. ايلىق جول ءجۇرۋ اقىسى 7200 تەڭگەدەن 9900 تەڭگەگە كوتەرىلدى، - دەدى ول.

ءماسليحات دەپۋتاتى قولما- قول تولەم جاساۋ مۇمكىندىگى نەگە الىنىپ تاستالعانىن دا ءتۇسىندىردى. ونىڭ ايتۋىنشا، تولەمنىڭ قولما-قول اقشاسىز جاسالۋى - جۇرگىزۋشىلەردىڭ جۇمىسىن جەڭىلدەتەدى، ولاردى الاڭداتاتىن سەبەپتەردى ازايتادى. وعان قوسا، تولەۋ جۇيەسىنىڭ اشىقتىعىن قامتاماسىز ەتىپ، بولاشاقتا سۋبسيديا كولەمىن ازايتۋعا مۇمكىندىك بەرەدى.

سونداي-اق نۇرسۇلتان شوقانوۆ «جولاقى الداعى جىلدارى تاعى دا قىمباتتاۋى مۇمكىن بە» دەگەن سۇراققا ناقتى جاۋاپ بەرمەسە دە، تاريفتەردىڭ كوتەرىلۋىن قولدايتىنىن ايتتى.

- مەنىڭ پىكىرىمشە، تاريفتەردى كوتەرۋ قاجەت. بۇگىن وزگە دە دەپۋتاتتار وسىعان ۇقساس ويلارىن ورتاعا سالدى. ويتكەنى كومەكتى شىنىمەن قاجەت ەتەتىن ادامداردىڭ توبىنا عانا سۋبسيديا جاسالۋى كەرەك. ولار: زەينەتكەرلەر، ستۋدەنتتەر، كوپبالالى انالار، - دەدى دەپۋتات.

اۆتور
دوسبول اتاجان