الماتىدا قۇرمانعازى كوشەسى ەكى ايعا جابىلادى
الماتى. KAZINFORM - الماتىدا قۇرمانعازى كوشەسىندەگى كولىك قوزعالىسى ەكى ايعا شەكتەلەدى.
«الماتى جىلۋ جەلىلەرى» مەكەمەسىنەن ءمالىم ەتكەندەي، 17-ماۋسىم مەن 17-تامىز ارالىعىندا مەدەۋ اۋدانىنداعى قۇرمانعازى كوشەسى بويىمەن پۋشكين كوشەسىنەن دوستىق داڭعىلىنا دەيىن جانە دوستىق داڭعىلىنان زەنكوۆ كوشەسىنە دەيىن اۆتوكولىك قوزعالىسى جابىلادى.
دوستىق داڭعىلىنان زەنكوۆ كوشەسىنە دەيىنگى قوزعالىس ەكى جاققا دا شەكتەلەدى.
«1986 -جىلدان بەرى پايدالانىلىپ كەلە جاتقان اتالعان كوشەنىڭ ءجۇرىس بولىگىنىڭ استىنان وتەتىن جالپى ۇزىندىعى 305 مەتر قۇبىردى قايتا جاڭارتۋ ۋچاسكەسىندە جوسپارلى جۇمىستاردى جۇرگىزۋ قاۋىپسىزدىگىن قامتاماسىز ەتۋ ءۇشىن ۋاقىتشا شەكتەۋلەر ەنگىزىلەدى. سوڭعى 5 جىلدا بۇل ۋچاسكەدە 10-عا جۋىق اقاۋ جويىلدى»، - دەپ حابارلادى «الماتى جىلۋ جەلىلەرى» ج ش س.
بۇل قۇبىر ۋچاسكەسى جىلۋمەن جانە ىستىق سۋمەن 5 كوپپاتەرلى تۇرعىن ءۇيدى جانە 4 وزگە دە وبەكتىلەردى قامتاماسىز ەتەدى.
اتالعان تۇتىنۋشىلارعا رەكونسترۋكتسيا جۇرگىزۋ كەزەڭىندە ىستىق سۋ بەرىلەتىن بولادى.
اۆتور
الما مۇقانوۆا
