الماتىدا قازاقستان مەن رەسەي قورعانىس مينيسترلەرى كەلىسسوز جۇرگىزدى
استانا. KAZINFORM - قازاقستان قورعانىس ۆەدومستۆوسىنىڭ باسشىسى ۇجىمدىق قاۋىپسىزدىك تۋرالى شارت ۇيىمى قورعانىس مينيسترلەرى كەڭەسىنىڭ وتىرىسىنا كەلگەن رەسەيلىك ارىپتەسىمەن كەزدەستى.
گەنەرال-پولكوۆنيك رۋسلان جاقسىلىقوۆ اندرەي بەلوۋسوۆتى قورعانىس ءمينيسترى لاۋازىمىنا تاعايىندالۋىمەن قۇتتىقتادى.
تاراپتار ەكىجاقتى اسكەري ىنتىماقتاستىقتىڭ وزەكتى اسپەكتىلەرىن تالقىلاپ، كادر دايىنداۋ جانە ۇجىمدىق قاۋىپسىزدىك تۋرالى شارتى ۇيىمى شەڭبەرىندەگى وقۋ-جاتتىعۋلاردى قوسا العاندا، بىرلەسكەن ءىس-شارالاردى وتكىزۋ ماسەلەلەرىن قوزعادى.
سونداي-اق، وڭىرلىك ۇيىمدار اياسىنداعى ءوزارا ءىس-قيمىل تۋرالى دا ءسوز بولدى. 2024 -جىلى قازاقستان ۇ ق ش ۇ مەن ش ى ۇ-عا، ال رەسەي ت م د-عا ءتوراعالىق ەتەدى. تاراپتار مەملەكەتارالىق بىرلەستىكتەردەگى ىنتىماقتاستىق وڭىرلىك قاۋىپسىزدىكتى نىعايتۋعا ىقپال ەتەتىنىن اتاپ ءوتتى.
«ونىڭ پراكتيكالىق تۇرعىدا ىسكە اسىرىلۋى كوپجاقتى وقۋ-جاتتىعۋلار شەڭبەرىندە دە جۇزەگە اسىرىلادى. گەنەرال-پولكوۆنيك رۋسلان جاقسىلىقوۆ رەسەيلىك ارىپتەسىن بيىلعى جىلدىڭ شىلدە ايىندا قازاقستاننىڭ باتىسىندا «بىرلەستىك» وقۋ-جاتتىعۋى وتەتىنىنەن حاباردار ەتتى. بىرلەسكەن ءىس-قيمىلداردىڭ جوسپارىنا سايكەس ازەربايجان، قىرعىزستان، تاجىكستان جانە وزبەكستان اسكەري كونتينگەنتتەرى قارۋلى قاقتىعىستاردى وقشاۋلاۋعا جانە زاڭسىز قۇرالىمدارعا قارسى ءىس-قيمىلعا بايلانىستى وقۋ- جاۋىنگەرلىك مىندەتتەردى بىرلەسىپ پىسىقتايدى»، - دەلىنگەن حابارلامادا.
كەزدەسۋ قورىتىندىسى بويىنشا قورعانىس ۆەدومستۆولارىنىڭ باسشىلارى كوپجوسپارلى ءوزارا ءىس-قيمىلدى جالعاستىرۋعا ۋاعدالاستى.
اۆتور
باقىتگۇل اباي قىزى
