الماتىدا ناۋرىز جاڭاشا قالاي اتاپ وتىلەدى
الماتى. قازاقپارات - 14-23-ناۋرىز ارالىعىندا الماتىدا-ناۋرىز مەيرامىن مەرەكەلەۋ اياسىندا 500 دەن استام ءتۇرلى ءىس-شارار ۇيىمداستىرىلادى.
الماتى اكىمدىگىنەن اتاپ وتكەندەي، باستى شارانىڭ ءبىرى - «كوش.-ناۋرىز - دۋمان» 21-ناۋرىزدا وتەدى. ات جانە كوستيۋم شەرۋىنە 500 گە جۋىق ادام قاتىسادى. مەرەكەلىك باستى كونسەرتتەر 21-ناۋرىزدا استانا جانە رەسپۋبليكا سارايىنىڭ الدىنداعى الاڭدا، سونداي-اق قالا اۋداندارىنىڭ بارلىق نەگىزگى الاڭدارىندا ۇيىمداستىرىلادى.
سونىمەن، 10 كۇن ىشىندە «ناۋرىزناما» كەزەڭىندە الماتىلىقتار مەن مەگاپوليس قوناقتارى قولونەرشىلەر مەن قولدانبالى ونەردىڭ تاقىرىپتىق كورمەلەرىنە، سپەكتاكلدەر مەن كونسەرتتەرگە، شىعارماشىلىق شەبەرلىك سىنىپتارى مەن پوەزيا كەشتەرىنە، مەرەكەلىك قايىرىمدىلىق اكسيالارىنا، جاستار فەستيۆالدەرىنە، زياتكەرلىك ويىندارعا، ۇلتتىق سپورت تۇرلەرى بويىنشا جارىستارعا جانە ءتۇرلى كونكۋرستارعا قاتىسا الادى.
ايتا كەتەرلىگى، 25 جانە 50 جىل بۇرىن وتباسىن قۇرعان ەرلى-زايىپتىلار اراسىندا «كۇمىس كەرەگە» جانە «التىن شاڭىراق» بايقاۋى ۇيىمداستىرىلادى.
سونداي-اق، مەديتسينالىق مەكەمەلەردە قالا تۇرعىندارى ءۇشىن سكرينينگتەن جانە پروفيلاكتيكالىق تەكسەرۋلەردەن ءوتۋ بويىنشا اكتسيالار جوسپارلانعان.
زاماناۋي ۇلتتىق كيىم تىگىنشىلەرى «تۇمار» ءسان اپتالىعىنا قاتىسىپ، كورەرمەندەردى قۋانتپاق. سونداي- اق ءسان يندۋسترياسىنىڭ وكىلدەرى Fashion show ۇلتتىق كيىم كونكۋرسىنا قاتىساتىن بولادى.
ەتنوديزاينەرلەر وداعى 17-24-ناۋرىز ارالىعىندا ارباتتا 100 گە جۋىق كاسىبي شەبەرلەردىڭ قاتىسۋىمەن قولونەر جارمەڭكەسىن وتكىزەدى.
ەكوبەلسەندىلەر، كوممۋنالدىق قىزمەت وكىلدەرى مەن بەلسەندى ازاماتتار اعاش وتىرعىزۋ، سۋ ايدىندارىن تازارتۋ جانە اۋلا اۋماقتارىن جيناۋ بويىنشا اكتسيا ۇيىمداستىرادى.
الماتىنىڭ بارلىق تەاترلارىندا بالالارعا دا، ەرەسەكتەرگە دە ارنالعان قويىلىمدار كورسەتىلەدى. مىسالى، قۋىرشاق تەاترى قازاق حالىق ەرتەگىلەرى نەگىزىندە «قاڭباق شال»، «ۇر، توقپاق» جانە «ەر توستىك» قويىلىمدارىن ۇسىنادى.
قازاق مەملەكەتتىك سيركى بالالار ۇيلەرىنە بارىپ بىرنەشە قايىرىمدىلىق قويىلىم قويادى.
«الماتى اۋەندەرى» ارتىستەرى الەۋمەتتىك قىزمەت كورسەتۋ ورتالىقتارىندا قايىرىمدىلىق كونسەرتتەر ۇيىمداستىرادى.
سونداي-اق «الاتاۋ» ءداستۇرلى ونەر تەاترى «ماملۇك. سۇلتان بەيبارىس» سپەكتاكلىن قويىپ، ءبىرقاتار قايىرىمدىلىق كونسەرت وتكىزەدى، الماتى مۋزەيلەرىندە اشىق ەسىك كۇنى، ىقىلاس اتىنداعى حالىق مۋزىكالىق اسپاپتار مۇراجايىندا «ءان جۇيرىگى ءبىرجان سال» اتتى تەاترلاندىرىلعان مۋزىكالىق كەش ۇيىمداستىرادى، مەملەكەتتىك مۇراعاتتا قازاق حالقىنىڭ سالت-داستۇرلەرى: ۇزاتۋ، بەت-اشار، تۇساۋ كەسەر، اتاستىرۋ، قالا كىتاپحانالارىندا ۆيكتورينا، كىتاپ جارمەڭكەلەرى جانە باسقا دا تاقىرىپتىق ءىس-شارالار وتەدى.
سونىمەن قاتار، الماتىدا 14-30-ناۋرىز ارالىعىندا Nauryz fest جاستار فەستيۆالى جانە 21-23-ناۋرىز ارالىعىندا استانا الاڭىندا 10:00 دە توعىزقۇمالاق، اسىق اتۋ، بەس اسىق، ارقان تارتۋ، قازاق كۇرەسى سياقتى ۇلتتىق سپورت تۇرلەرى بويىنشا سپورت فەستيۆالى وتەدى.
ناۋرىز مەيرامىنداعى مەرەكەلىك كونسەرتتەر بىرنەشە جەردە وتەدى:
- 21-ناۋرىز كۇنى ساعات 11:00 دە «ناۋرىز - بەرەكە باستاۋى» مەرەكەلىك كونسەرتى استانا الاڭىندا؛
- 21-ناۋرىزدا ساعات 11:00 دە ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ اۋماعىندا جانە 21-ناۋرىز كۇنى ساعات 12:00 دە اباي اتىنداعى الاڭدا؛
- 21-22-ناۋرىزدا استانا الاڭىندا ساعات 19:00 دەن 22:00 گە دەيىن تانىمال ارتىستەردىڭ قاتىسۋىمەن كونسەرتتەر وتەدى.
- 21-23-ناۋرىز ارالىعىندا ارباتتا (پانفيلوۆ- جىبەك جولى كوشەسى) ناۋرىز مەيرامىنا ارنالعان ويىن-ساۋىق-تانىمدىق باعدارلامالار ۇيىمداستىرىلادى.
ناۋرىز مەيرامىن مەرەكەلەۋ اياسىندا الماتىدا جوسپارلانعان مادەني-بۇقارالىق ءىس-شارالار مەن ءتۇرلى كونكۋرستاردىڭ ءتىزىمى قالا اكىمدىگىنىڭ رەسمي سايتىندا جاريالانعان.
اۆتور
الما مۇقانوۆا
