الماتىدا ناۋقاس تۋبديسپانسەردەن قاشىپ كەتتى
الماتى. KAZINFORM - الماتىدا تۋبديسپانسەردىڭ دۋالىن اتتاپ، سىرتقا قاشىپ بارا جاتقان ناۋقاستىڭ سۋرەتى جەلىگە شىقتى.
جەلىگە شىققان اقپاراتقا سايكەس، الماتى تۋبەركۋلەز ديسپانسەرىنىڭ ناۋقاستارى سىرتقا ەركىن شىعىپ، كوشەدە قىدىرىپ جۇرەدى.
«بۇل جەردە بالاباقشا مەن دۇكەندەر بار. جەرگىلىكتى تۇرعىندار شارا قابىلداۋدى تالاپ ەتەدى» دەلىنگەن ۆيدەوداعى جازبادا.
الماتى قالاسىنىڭ فتيزيوپۋلمونولوگيا ورتالىعىنىڭ اكىمشىلىگى اتالعان وقيعاعا قاتىستى ستاتسيونار كوميسسياسى ناۋقاستى تەكسەرىپ، ونىمەن اڭگىمە جۇرگىزگەنىن، سونداي- اق، اۋرۋحانا رەجيمىن ساقتاماعانى جونىندە حاتتاما تولتىرىلعانىن حابارلادى.
«اۋرۋحانادا پاتسيەنتتەرگە باقىلاۋ جۇرگىزىلەدى، بارلىق قىزمەتكەرلەرگە پاتسيەنتتەردى قاجەت بولعان جاعدايدا عانا وتكىزۋ تۋرالى نۇسقاۋ بەرىلگەن. سونداي- اق، دەگدار كوشەسى، 45 مەكەنجايىندا ورنالاسقان فتيزيوپۋلمونولوگيا ورتالىعىنا تۋبەركۋلەزدىڭ جۇقپالى جانە جۇقپالى ەمەس تۇرىمەن دە ناۋقاستار تۇسەتىنىن ايتۋ كەرەك. ەكى اپتالىق ەمدەۋدەن سوڭ ناۋقاستار باسقا ادامدارعا قاۋىپ توندىرمەيدى، ولار امبۋلاتورلىق ەم الا الادى» دەپ جاۋاپ بەردى اۋرۋحانا اكىمشىلىگى.
سونداي- اق اۋرۋحانانىڭ مالىمەتىنشە، باكتەريالىق ءبولىنۋى جوق پاتسيەنت قاجەتتىلىگى بويىنشا رۇقسات قاعازى ارقىلى سىرتقا شىعۋىنا مۇمكىندىگى بار ەكەنىن حابارلادى.
«ەگەر ناۋقاستا باكتەريالىق ءبولىنۋ جالعاسسا، اۋماقتان سىرتقا شىعۋعا رۇقسات ەتىلمەيدى. دەسەك تە، رەجيمدى بۇزۋشىلار كەزدەسەدى. ءار ناۋقاس ستاتسيونارعا تۇسكەن كەزدە ولارمەن اۋرۋحانالىق رەجيمدى ساقتاۋ جونىندە اڭگىمە جۇرگىزىلەدى» دەپ حابارلادى الماتى قالاسىنىڭ فتيزيوپۋلمونولوگيا ورتالىعىنىڭ اكىمشىلىگى.
اۆتور
دۋمان ارعىنگەلدى
