الماتىدا مونشا كەشەنىندە ءىرى ءورت بولدى

الماتى. KAZINFORM - الماتىدا مونشا كەشەنىندە بولعان ءورت ءسوندىرىلدى.

توتەنشە جاعداي مينيسترلىگىنەن حابارلاعانداي، ءورتتىڭ ەكى قاباتتى اعاش سارايعا جانە كورشى عيماراتتارعا تارالۋىنا جول بەرىلمەدى.

«ناقتىلانعان اقپارات بويىنشا ءورت الاڭى 380 شارشى مەتردى قۇرادى. قازا تاپقاندار مەن زارداپ شەككەندەر جوق. ءورتتىڭ سەبەبى انىقتالۋدا»، - دەپ حابارلادى ق ر ت ج م باسپا ءسوز قىزمەتى.

ەسكە سالايىق، بۇگىن كەشكى ساعات 18:00 دە الماتىلىق ءورت سوندىرۋشىلەر جوعارى دارەجە بويىنشا مەدەۋ اۋدانى، وسپانوۆ كوشەسى، 85/77 مەكەنجايىندا ورنالاسقان مونشا كەشەنىندە شىققان ورتكە جىبەرىلدى. «قاربالاس ۋاقىتتا» تاۋلى ايماققا اپاراتىن جولداعى جول كەپتەلىسى ءورت ءسوندىرۋ تەحنيكاسىنا كەدەرگى تۋدىرعان.

بارلاۋ بارىسىندا، ءورت سوندىرۋشىلەر ەكى اعاش قۇرىلىسى، ءىشىنارا ءۇشىنشىسى دە جانىپ جاتقانىن انىقتادى، وتتىڭ كورشى اعاش كوتتەدجدەرگە تارالۋ قاۋپى تۋىندادى. نىسان اكىمشىلىگىنىڭ ايتۋىنشا، كەلۋشىلەر بولماعان.

«دەرەۋ جەدەل شتاب ورنالاستىرىلىپ، ءورت وقپاندارى ەنگىزىلدى، ارالاس تاسىلمەن سۋدىڭ ۇزدىكسىز بەرىلۋى قامتاماسىز ەتىلدى. پوليتسيا دەپارتامەنتىنىڭ قىزمەتكەرلەرى ءورت بولعان جەردى قورشاۋدى ۇيىمداستىردى. كەز كەلگەن مينۋتتا مونشا كەشەنىنىڭ جانىندا تۇرعان اعاش قۇرىلىستار ورتەنۋى مۇمكىن ەدى. ءورتتى سوندىرۋگە جەكە قۇرامنان 77 ادام، 19 بىرلىك تەحنيكا، سونداي- اق قالانىڭ ءوزارا ءىس-قيمىل قىزمەتى جۇمىلدىرىلدى»، - دەپ اتاپ ءوتتى ق ر ت ج م- دا.