الماتىدا موپەد پەن پوليتسيا ەكيپاجىنىڭ كولىگى سوقتىعىستى

الماتى. KAZINFORM - الماتىدا تۇتاس جولاقتى كەسىپ وتكەن پوليتسيا كولىگىنە موپەد سوعىلدى.

الەۋمەتتىك جەلىگە شىققان ۆيدەودان تۇتاس جولاقتى كەسىپ وتكەن پوليتسيا كولىگىنە موپەدتىڭ سوعىلعانىن كورۋگە بولادى. جەلىدەگى جازبادا اتالعان ۆيدەونىڭ كوپتەگەن الەۋمەتتىك جەلىنىڭ كانالدارىنان الىپ تاستالعانى جازىلعان.

الماتى قالالىق پوليتسيا دەپارتامەنتىنىڭ مالىمەتىنشە، جول اپاتى قالانىڭ جەتىسۋ اۋدانىندا بولعان. شۇعىل شاقىرۋعا شىققان پاترۋلدىك پوليتسيا ەكيپاجى الدىن الا جىپىلىقتايتىن شامدار مەن جارىق سيگنالدى داۋىس زورايتقىش قوندىرعىنى قوسىپ، بەلگىلەنگەن ەرەجەلەردى قاتاڭ ساقتاي وتىرىپ، كەرى بۇرىلۋ مانيەۆرىن جاسادى. جول قوزعالىسىنا قاتىسۋشىلار پوليتسيا كولىگىنە جول بەرگەن. الايدا، قوعامدىق كولىككە ارنالعان جولمەن كەلە جاتقان موپەد جۇرگىزۋشىسى زاڭ تالابىن ەلەمەي، پاترۋلدىك كولىكپەن سوقتىعىسقان.

«موپەد جۇرگىزۋشىسى مەديتسينالىق كومەكتەن باس تارتتى. جول اپاتى فاكتىسى تىركەلدى. «Chevrolet» اۆتوكولىگىنىڭ جۇرگىزۋشىسى جاۋاپقا تارتىلدى. وندىرىستىك ماتەريالدار سوتقا جىبەرىلەتىن بولادى»، - دەپ حابارلادى قالالىق پوليتسيا دەپارتامەنتىنىڭ باسپا ءسوز قىزمەتى.

ەسكە سالايىق، بۇعان دەيىن الماتىدا جول تالعامايتىن كولىكپەن ەكى موپەد سوقتىعىسىپ، ءبىر ادام كوز جۇمعان بولاتىن.

سونداي-اق قازاقستاندا موپەد جۇرگىزۋشىلەرىنە جاڭا تالاپتار قويىلاتىنىن جازعانبىز.