الماتىدا مەترو مەن تەمىر جول ۆوكزالى جەراستى توننەلى ارقىلى بايلانىسادى

الماتى. KAZINFORM - «الماتى-2» تەمىر جول ۆوكزالى مەن «رايىمبەك باتىر» مەترو بەكەتىنىڭ اراسىندا جەراستى توننەلى سالىنادى.

قالالىق موبيلدىلىك باسقارماسى Kazinform ساۋالىنا جاۋاپ بەرىپ، قۇرىلىس جوباسى ازىرلەنىپ جاتقانىن راستادى.

- «الماتى-2» تەمىر جول ۆوكزالى مەن «رايىمبەك باتىر» مەترو بەكەتى ءبىر-بىرىنەن ايتارلىقتاي الشاق ورنالاسقان. بۇل ماڭىزدى كولىك توراپتارى اراسىندا جولاۋشىلاردىڭ اۋىسىپ وتىرۋىن قيىنداتادى. وسىعان بايلانىستى جەراستى توننەلى ءبىر توراپتان ەكىنشىسىنە قاۋىپسىز ءارى جىلدام بارۋعا مۇمكىندىك بەرەدى، - دەپ حابارلادى باسقارمادان.

جوبا بويىنشا توننەلدىڭ ۇزىندىعى 485 مەتر، ەنى 6,3 مەتر جانە بيىكتىگى 3 مەتر بولادى. وعان قوسا، 42 مەتر بولاتىن قوسىمشا جەراستى ءدالىز، ەكى كىرەبەرىس، ەكى ليفت شاحتاسى جانە اپاتتىق شىعۋ جولى سالىنادى. ودان بولەك جارناما تاقتالارى مەن جول بەلگىلەرى قويىلادى.

- جوبانىڭ قۇنى مەملەكەتتىك ساراپتامانىڭ قورىتىندىسى بويىنشا بەلگىلى بولادى، - دەلىنگەن باسقارما جاۋابىندا.

قۇرىلىس جۇمىستارى 2025 -جىلدىڭ ءۇشىنشى توقسانىندا باستالىپ، 12 ايدان كەيىن اياقتالادى دەپ جوسپارلانعان.

ەسكە سالايىق، بۇعان دەيىن الماتىدا ەكى كوپقاباتتى اۆتوتۇراقتىڭ جوباسى ازىرلەنىپ جاتقانىن جازعانبىز.

اۆتور

دوسبول اتاجان