الماتىدا مۇرات اۋەزوۆپەن قوشتاسۋ ءراسىمى بولدى
الماتى. KAZINFORM - م. اۋەزوۆ اتىنداعى قازاق ۇلتتىق دراما تەاترىندا مەملەكەت جانە قوعام قايراتكەرى مۇرات مۇحتار ۇلى اۋەزوۆپەن قوشتاسۋ ءراسىمى ءوتتى.
قوشتاسۋ راسىمىنە مينيسترلىك پەن اكىمدىك وكىلدەرى، سەنات دەپۋتاتتارى، قوعام قايراتكەرلەرى مەن قازاق زيالىلارى، مارقۇمنىڭ تۋعان-تۋىستارى قاتىستى. ءىس-شارا بارىسىندا مەملەكەت باسشىسىنىڭ كوڭىل ايتۋ حاتىن پرەزيدەنت كەڭەسشىسى مالىك وتاربايەۆ وقىدى.
- اسا كورنەكتى مەملەكەت جانە قوعام قايراتكەرى، مادەنيەتتانۋشى، شىعىستانۋشى عالىم، ءبىرىنشى دارەجەلى بارىس وردەنىنىڭ يەگەرى، ديپلومات مۇرات مۇحتار ۇلى اۋەزوۆتىڭ دۇنيەدەن وتۋىنە بايلانىستى قايعىلارىڭىزعا ورتاقتاسىپ، كوڭىل ايتامىن. مۇرات مۇحتار ۇلى ۇلت رۋحانياتىنىڭ العا باسۋىنا، قازاق عىلىمىنىڭ كوكجيەگىن كەڭەيتۋگە بار سانالى عۇمىرىن ارناعان زيالى، پاراساتتى تۇلعا ەدى. قازاق ادەبيەتى مەن مادەنيەتىن، تاريحىن تەرەڭ زەردەلەپ، سوندا ولشەۋسىز مۇرا قالدىردى. قازاقستاننىڭ حالىقارالىق دارەجەدەگى بەدەلىنىڭ ارتۋىنا ءوزىنىڭ ساياسي قوعامدىق ىستەرىمەن زور ۇلەس قوستى، - دەلىنگەن مەملەكەت باسشىسىنىڭ كوڭىل ايتۋ حاتىندا.
قوشتاسۋ راسىمىندە مەملەكەت جانە قوعام قايراتكەرى مۇحتار قۇل-مۇحامەد تە ءسوز سويلەپ، مۇرات اۋەزوۆتىڭ تۋعان-تۋىستارىنا كوڭىل ايتتى.
- اسىلدىڭ سىنىعى دەسەك تە، تۇلپاردىڭ تۇياعى دەسەك تە جاراساتىن اسىل اداممەن قوشتاسۋعا كەلىپ وتىرمىز. مۇحتار اۋەزوۆتىڭ 4 ۇلى بولعان. ءبىرىنشىسى، شوقان دەگەن بالاسى 1 جاسىندا شەتىنەپ كەتكەن. ودان كەيىن لەنينگرادتا وقىپ جۇرگەن كەزدە ۆالەنتينا جەڭگەمىزدەن تۋعان ەلدەس دەگەن بالا دا 1 جاسىندا قايتىس بولعان. ودان كەيىن ەلدار دەگەن بالاسى 3 جاسىندا شەتىنەپ كەتەدى. ۇلدان تۇقىمسىز قالام با دەپ جۇرگەندە فاتيما جەڭگەمىزبەن كوڭىل جاراستىرىپ، دۇنيەگە مۇرات كەلەدى. مۇراتتى اناسىنىڭ قۇرساعىنا بىتكەن كۇننەن باستاپ ايالاعان ادام - مۇحتار اۋەزوۆ. «التىن بالام» دەپ حات تانىماعان بالاسىنا تالاي حات جازعان. مىنە سول التىن بالا اكەسىنىڭ سەنىمىن اقتادى، - دەدى مۇحتار قۇل-مۇحامەد.
اۆتور
دوسبول اتاجان
