الماتىدا ۇلكەن جالعان كيستاسى بار ەر ادامعا كۇردەلى وپەراتسيا جاسالدى

الماتىنىڭ جەتەكشى حيرۋرگتارى كيستانىڭ قۋىسىن اسقازانمەن بايلانىستىرا وتىرىپ، اناتوميالىق جانە فيزيولوگيالىق فۋنكسيونالدىق تاسىلمەن ۇلكەن جالعان كيستالىق ۇيقى بەزى مەن كەرنەۋلى استسيتى بار ەر ادامعا وپەراتسيا جاسادى، دەپ حابارلايدى Kazinform دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ.

№7-الماتى قالالىق كلينيكالىق اۋرۋحاناسىنىڭ 64 جاستاعى پاتسيەنتى سوڭعى بىرنەشە جىلدىڭ ىشىندە ەپيگاستريا اۋماعىنداعى قاتتى اۋىرسىنۋدان، اس قورىتۋ پروتسەسىنىڭ بۇزىلۋىنان، مەزگىل- مەزگىل جۇرەكتىڭ اينۋىنان، قۇسۋدان، ءىش قاتۋدان، سالماق جوعالتۋدان زارداپ شەككەن. جاعدايدى «قاتايعان استسيت» قيىنداتا ءتۇستى - ءىشى ۇلكەيىپ، كىندىگى سىرتقا شىعىپ تۇردى.

«ەر ادامعا جاتۋ ءتىپتى قيىن بولدى، ويتكەنى جاتقان كەزدە جۇرەك- وكپە جەتكىلىكسىزدىگى بولدى. ءبىر سوزبەن ايتقاندا، ءومىر ءسۇرۋ ساپاسى اسا اۋىر بولدى. ول قايدا بارۋ كەرەكتىگىن جانە ونىڭ اۋرۋىنان قۇتىلۋ مۇمكىن بە، جوق پا بىلمەدى. ءبىر كەزدە ەر ادامعا تانىستارى «جەتىگە» بارۋدى ۇسىندى، بۇل كلينيكانىڭ حيرۋرگياسى وتە كۇشتى ەكەنىن ءتۇسىندىردى. №7 ق ك ا-دا ول حيرۋرگپەن كەڭەسىپ، ەمحانا جاعدايىندا زەرتتەلدى، «ۇيقى بەزىنىڭ جالعان كيستاسى» (ۇ ب ك) دياگنوزى قويىلدى. ول م ءا م س شەڭبەرىندە ەمدەۋگە جاتقىزۋ بيۋروسىنىڭ پورتالى بويىنشا جوسپارلى جەدەل ەمدەۋگە جىبەرىلدى.

«ۇيقى بەزىنىڭ جالعان كيستاسى - بۇل ۇيقى بەزى فەرمەنتتەرىنىڭ، قاننىڭ وتە كوپ مولشەرىن قامتيتىن سۇيىقتىقتىڭ شەكتەۋلى جينالۋى، سونىمەن قاتار نەكروتيكالىق (ءولى) تىندەر بولۋى مۇمكىن. ۇ ب ك-نىڭ پايدا بولۋ سەبەبى - بۇل باستان وتكەرگەنپانكرەاتيت نەمەسە پانكرەونەكروز، ول كوبىنەسە ءوت-تاس اۋرۋى، اسقازان- ىشەك جولدارىنىڭ ويىق جاراسى، الكوگولدى قابىلداۋ، دۇرىس تاماقتانباۋ، ءىشتىڭ جاراقاتى اياسىندا داميدى. ۇ ب ك-نىڭ بەلگىلەرى ونىڭ مولشەرى ۇلعايعان سايىن كۇشەيە تۇسەدى. كورشى اعزالاردى كيستانىڭ قىسۋى، ءىش قۋىسىندا سۇيىقتىقتىڭ جينالۋى سياقتى. ەگەر ۇ ب ك-عا كۇدىك بولعان كەزدە پاتسيەنت بەكىتىلۋ ءۇشىن ەمحاناعا ماماندارعا جۇگىنۋى كەرەك. دياگنوز قويۋ ءۇشىن ۋلترادىبىستىق زەرتتەۋ، ءىش قۋىسى اعزالارىنىڭ كومپيۋتەرلىك توموگرافياسى جۇرگىزىلەدى»، - دەيدى №7 ق ك ا ديرەكتورى ماناس رامازانوۆ.

2015 -جىلى ول اۋىر پانكرەونەكروزدى باستان وتكەرگەن. ۋاقىت وتە كەلە، پانكرەونەكروزدىڭ سالدارىنان پاتسيەنتتە ۇ ب ك دامىعان، كلينيكالىق بەلگىلەر پايدا بولا باستاعان. پاتسيەنتكە وپەراتسيا جاساعان كوپ جىلدىق تاجىريبەسى بار حيرۋرگ ماناس رامازانوۆ بۇل پاتسيەنتتەر وپەراتسياعا بايىپتى دايىندىقتى قاجەت ەتەتىنىن اتاپ ءوتتى. ويتكەنى ولاردا تاماقتانۋدىڭ بۇزىلۋىنا جانە تاعامنىڭ قورىتىلۋىنا بايلانىستى اقۋىزدىق ەنەرگيالىق جەتىسپەۋشىلىگى داميدى.

«الدىن الا دايىندىقتان كەيىن پاتسيەنت وپەراتسياعا الىنادى. 4 ساعاتتىق كۇردەلى وپەراتسيا جاسالدى. ءبىز كيستانىڭ قۋىسىن اسقازانمەن بايلانىستىردىق. ۇبك كەزىندە كيستانى ءداستۇرلى الىپ تاستاۋ ارقىلى جويۋ مۇمكىن ەمەس، ويتكەنى كيستا ۇيقى بەزىمەن بايلانىسقان جانە ۇنەمى فەرمەنتتەر شىعارادى. بۇل جاعدايدا ءبىز كيستانى اسقازاننىڭ ارتقى قابىرعاسىمەن بايلانىستىردىق. وسىلايشا كيستا سۇيىقتىعىنىڭ جينالماي اسقازان-ىشەك جولىنا تۇسۋىنە مۇمكىندىك بەردىك. سونىمەن قاتار ۇ ب ك-عا بايلانىستى پاتسيەنتتە وپەراتسيا كەزىندە قوسىمشا قيىندىقتار تۋدىراتىن قاتايعان استسيت بار. بارلىق تەحنيكالىق قيىندىقتارعا جانە وزىندىك ەرەكشەلىگىنە قاراماستان، وپەراتسيا جوسپار بويىنشا ءتيىستى دەڭگەيدە ورىندالدى. ال وپەراتسيادان كەيىنگى كەزەڭ اسقىنۋسىز بىركەلكى ءوتتى»، - دەپ ءبولىستى پروفەسسور رامازانوۆ.

تاجىريبەلى حيرۋرگتىڭ جەتەكشىلىگىمەن وپەراتسيالىق توپتىڭ جوعارى كاسىبي، شەبەر جۇمىسىنىڭ ارقاسىندا ناۋقاس اۋرۋدىڭ اۋىر كلينيكالىق كورىنىستەرىنەن، بارلىق اسقىنۋلار مەن قاۋىپتەردەن ارىلدى. سونىمەن قاتار كوڭىل كۇيى دە جاقساردى. دارىگەرلەر ءوز جۇمىسىن كەرەمەت ورىنداپ، پاتسيەنتكە ودان ءارى ساپالى ءومىر سۇرۋگە مۇمكىندىك بەردى.

ەندىگى جەردە ءبارى دەرلىك وزىنە بايلانىستى: سالاماتتى ءومىر سالتىن ۇستانۋ، دۇرىس تاماقتانۋ، جامان ادەتتەردەن باس تارتۋ وعان وسى اۋرۋدان ءبىرجولا ارىلۋعا مۇمكىندىك بەرەدى.