الماتىدا ۇلكەن ءۇش ساياباق جاڭارتىلماق
الماتى. KAZINFORM - الماتىدا تۇڭعىش پرەزيدەنت، «اتاكەنت» جانە «وڭتۇستىك» ساياباقتارى اباتتاندىرىلادى. بۇل تۋرالى ەربولات دوسايەۆ بوستاندىق اۋدانى تۇرعىندارىمەن كەزدەسۋدە مالىمدەدى.
شاھار باسشىسىنىڭ ايتۋىنشا، بوستاندىق اۋدانىنداعى قوعامدىق كەڭىستىكتەر مەن سۋبۇرقاقتاردى رەكونسترۋكسيالاۋعا جانە اباتتاندىرۋعا جوبالاۋ-سمەتالىق قۇجاتتاما ازىرلەنەدى.
«قالانىڭ تاريحي بىرەگەيلىگىن ەسكەرە وتىرىپ، قوعامدىق كەڭىستىكتەردى ساپالى قايتا قۇرۋ ماقساتىندا تۇڭعىش پرەزيدەنت ساياباعىن، اتاكەنت» اۋماعىن، «وڭتۇستىك» ساياباعىن، نۇر-الاتاۋ شاعىن اۋدانىنداعى سكۆەردى قايتا جاڭارتۋ مەن اباتتاندىرۋعا، سيرك الدىنداعى، مۇستافين كوشەسىنىڭ بويىنداعى جانە ءال-فارابي اتىنداعى قاز ۇ ۋ ستۋدەنتتەر سارايىنىڭ الدىنداعى سۋبۇرقاقتاردى كۇردەلى جوندەۋدەن وتكىزۋ ءۇشىن جوبالاۋ-سمەتالىق قۇجاتتاما ازىرلەنىپ جاتىر»، - دەدى ەربولات دوسايەۆ.
جوبالىق قۇجاتتامانىڭ مەملەكەتتىك ساراپتاماسى وسى جىلدىڭ جەلتوقسان ايىندا دايىن بولادى.
ەسكە سالايىق، بىلتىر الماتىدا «وڭتۇستىك» ساياباعى مەملەكەت مەنشىگىنە قايتارىلعان بولاتىن. اكىمدىك جەكە كومپانياعا 2,3 ميلليارد تەڭگەدەن استام سوما وتەماقى تولەدى.
سونداي-اق ءاليا مەن مانشۇك اتىنداعى ساياباقتى قالپىنا كەلتىرۋ جۇمىستارى كۇزدە اياقتالاتىنى تۋرالى جازعان بولاتىنبىز.
