الماتىدا ەكى زەينەتكەر ەمشىگە بارىپ، اۋرۋىن اسقىندىرىپ العان

ота
فوتو: الماتى دەنساۋلىق ساقتاۋ باسقارماسى

الماتى. KAZINFORM - نەيروحيرۋرگ دارىگەرلەر ەكى قارت اجەيدى سال بولىپ قالۋدان قۇتقاردى. قالالىق دەنساۋلىق ساقتاۋ باسقارماسىنان ءمالىم ەتكەندەي، ەكى زەينەتكەر ورتالىق قالالىق كلينيكالىق اۋرۋحاناسىنا بىردەي دياگنوزبەن جۇگىنگەن. ياعني، جۇلىن كانالىنداعى جۇيكە ءتىنىنىڭ ىسىگى.

ناۋقاستاردىڭ ايتۋىنشا، ولار جاسىنا جانە باسقا دا ىلەسپە اۋرۋلارىنا بايلانىستى وتا جاساتۋعا قورقىپ، ەمشىلەردەن ەم ىزدەگەن.

ءبىراق جاعدايى ناشارلاپ، دارىگەرگە جۇگىنگەن.

«وتانىڭ قيىندىعى - ىسىكتىڭ جۇلىننىڭ سىرتىندا ەمەس ىشىندە ورنالاسۋىندا بولدى. جۇلىننىڭ وزىنە زاقىم كەلتىرۋ قاۋپى جوعارى ەدى. قۇدايعا شۇكىر، ەكى وپەراتسيا دا ءساتتى ءوتتى جانە ءارقايسى شامامەن 3,5 ساعاتقا سوزىلدى. بۇل وتالاردى جاساۋ بارىسىندا ءبىز ءوز قوزعالىسىمىزدى باقىلاۋ جانە جۇلىننىڭ ساۋ بولىكتەرىنىڭ زاقىمدانۋىن بولدىرماۋ ءۇشىن نەيرومونيتورلار مەن نەيروناۆيگاتسيالىق جۇيەنى قولداندىق»، - دەيدى وقكا نەيروحيرۋرگيا ءبولىمىنىڭ مەڭگەرۋشىسى مارات الماتوۆ. وتادان كەيىنگى كەزەڭدە ناۋقاستار ستاتسيوناردا وڭالتۋدان ءوتتى، ناتيجەسىندە 12 كۇن ىشىندە اياقتىڭ نيەۆرولوگيالىق بۇزىلىسىنىڭ رەگرەسسياسى 80 پايىزعا دەيىن جەتتى. 

سوڭعى جاڭالىقتار