الماتىدا ەكى ەر ادامنان 190 تەلەفون كارتاسى مەن sim-box قۇرىلعىسى تاركىلەندى

استانا. KAZINFORM - ءى ءى م وتاندىق ۇيالى بايلانىس وپەراتورلارىمەن بىرلەسىپ، ەل اۋماعىندا الاياقتىق قىزمەتتىڭ جولىن كەسۋ بويىنشا جۇمىستى جالعاستىرىپ جاتىر. بۇل تۋرالى Polisia.kz حابارلادى.

رەسپۋبليكانىڭ اۋماعىندا ءتۇرلى مەسسەندجەرلەر ارقىلى قازاقستاندىقتارعا قوڭىراۋ شالۋ ءۇشىن ينتەرنەت- الاياقتار sim-box قۇرىلعىلارىن پايدالانادى.

ادامداردى الداۋ ءۇشىن قىلمىسكەرلەردىڭ بەلگىلى ءبىر ەلدە بولۋى مىندەتتى ەمەس. Sim-box قۇرىلعىلارىنىڭ بولۋى جەتكىلىكتى. ولار جەرگىلىكتى ۇيالى بايلانىس وپەراتورلارىنىڭ ينتەرنەت- ترافيگىن قولدانا وتىرىپ، جالعان نومىرلەرمەن بايلانىس ورناتۋعا مۇمكىندىك بەرەدى.

جاڭا جىل قارساڭىندا ءى ءى م كيبەرقىلمىسقا قارسى ءىس-قيمىل دەپارتامەنتىنىڭ ۇيلەستىرۋىمەن الماتى پ د پوليتسيا قىزمەتكەرلەرى جالدامالى پاتەردە sim-box قۇرىلعىسىنىڭ ۇزدىكسىز جۇمىسىن قامتاماسىز ەتكەن 25 جاستاعى ەكى جىگىتتى ۇستادى. جەدەل ۋاكىلدەر پاتەردى ءتىنتۋ كەزىندە ءارقايسىسى 32 سلوتتىق ءتورت sim-box قۇرىلعىسىن جانە قازاقستاندىق ۇيالى بايلانىس وپەراتورلارىنىڭ 190 sim-كارتاسىن، بىرنەشە تەلەفون مەن نوۋتبۋكتاردى تاركىلەدى.

تەرگەۋ امالدارى جۇرگىزىلىپ جاتىر. ۇستالعاندارعا قاتىستى «قاماۋدا ۇستاۋ» بۇلتارتپاۋ شاراسى تاڭدالدى.