الماتىدا كولىك اعاشقا سوعىلىپ، ءتورت جاس جىگىت مەرت بولدى

  الماتى. KAZINFORM - الماتىدا لادا كولىگى اعاشقا سوعىلىپ، ءتورت ادام قازا تاپتى.

جەرگىلىكتى پوليتسيا قىزمەتىنىڭ كەزەكشى ءبولىمىنىڭ مالىمەتىنشە، جول اپاتى بۇگىن تۇنگى ساعات 2:20 دا الماتىنىڭ مەدەۋ اۋدانىندا بولدى. ۇلكەن الماتى كانالى بويىمەن شىعىس باعىتتا كەلە جاتقان لادا كولىگىنىڭ جۇرگىزۋشىسى رۋلگە يە بولا الماي، جول جيەگىنە شىعىپ كەتىپ، اعاشقا سوعىلعان.

«سالدارىنان كولىك جۇرگىزۋشىسى مەن ونىڭ ءۇش جولاۋشىسى وقيعا ورنىندا كوز جۇمدى، تاعى ءبىر جولاۋشى دەنە جاراقاتىمەن قالالىق اۋرۋحانالاردىڭ بىرىنە جەتكىزىلدى. ولاردىڭ ءبارى الماتى وبلىسى، تالعار اۋدانىنىڭ تۇرعىنى ەكەنى بەلگىلى بولدى»، - دەپ حابارلادى پوليتسيادان.

ءتورت ادامنىڭ ولىمىنە اكەلىپ سوققان اپات بويىنشا قىلمىستىق ءىس قوزعالىپ، ساراپتامالار تاعايىندالدى.

ۆەدومستۆودان اتاپ وتكەندەي، قايتىس بولعاندار 21-22 جاستاعى جىگىتتەر.