الماتىدا كاسىپكەر مەملەكەتتىك ينسپەكتوردى سوققىعا جىقتى
الماتى. KAZINFORM - الماتىدا قالالىق جەر رەسۋرستارىن باسقارۋ دەپارتامەنتىنىڭ مەملەكەتتىك ينسپەكتورىنا پىشاقپەن شابۋىل جاسالدى. كۇدىكتى ۇستالدى.
اۋىل شارۋاشىلىعى مينيسترلىگىنىڭ باسپا ءسوز قىزمەتى ءمالىم ەتكەندەي، وسى ماۋسىم ايىندا دەپارتامەنتكە كەلىپ تۇسكەن ءوتىنىش نەگىزىندە كاسىپكەرگە قاتىستى جەر زاڭناماسىنىڭ ساقتالۋىنا تەكسەرۋ جۇمىستارى باستالعان.
«تەكسەرۋ بارىسىندا كاسىپكەر ا. قۇجاتسىز ۋچاسكەدە ساۋدا پاۆيلونىن ورناتىپ، جالپى اۋدانى 0,0012 گەكتار مەملەكەتتىك مەنشىك جەرىن ءوز بەتىنشە يەلەنگەنى انىقتالدى. ونىڭ نەگىزىندە اكىمشىلىك قۇقىق بۇزۋشىلىق تۋرالى كودەكستىڭ 136-بابى بويىنشا شارا قابىلداندى جانە 21-ماۋسىمدا وسى پاۆيلوندى ءبىر ايلىق ورىنداۋ مەرزىمىمەن بۇزۋ جونىندە نۇسقاما بەرىلگەن بولاتىن»، - دەلىنگەن مينيسترلىك مالىمدەمەسىندە.
بۇيرىقتى ورىنداۋدان باستارتقان كاسىپكەر دەپارتامەنت ينسپەكتورىنا پىشاقپەن شابۋىل جاساعان.
«قازىرگى تاڭدا قىزمەتكەر مەديتسينالىق مەكەمەگە جاتقىزىلدى. جابىرلەنۋشىدە پىشاق جاراقاتتارى جوق، مۇرنى سىنعان، كوز اينالاسىنا زيان كەلگەن»، - دەپ اتاپ ءوتتى ۆەدومستۆودان.
الماتى قالالىق پوليتسيا دەپارتامەنتى كۇدىكتىنىڭ ۇستالعانىن جەتكىزدى.
«قارۋ قولدانۋ ارقىلى جاسالعان بۇزاقىلىق دەرەگى بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. سوت ءۇيقاماق تۇرىندەگى بۇلتارتپاۋ شاراسىن تاڭدادى. قىلمىستىق قارۋ تاركىلەندى. باسقا دا ءمان-جاي انىقتالىپ جاتىر»، - دەپ حابارلادى الماتى قالالىق پوليتسيا دەپارتامەنتىنەن.
