الماتىدا جىگىتپەن كەزدەسۋگە بارعان بويجەتكەن مەرت بولدى
الماتىلىق بويجەتكەن جىگىتىمەن ءدامحانادا العاش رەت كەزدەسكەن سوڭ قايتىس بولدى.
بۇل تۋرالى جۋرناليست ساندۋعاش دۇيسەنوۆا الەۋمەتتىك جەلىدە جازدى، دەپ حابارلايدى Kazinform.
ساندۋعاش دۇيسەنوۆانىڭ مالىمەتىنشە، كەزدەسۋگە بارعان قىزدىڭ اتى- ءجونى ايناگۇل كەنچەبايەۆا بولعان. ول قازاننىڭ 17 ءسى كۇنى ەر ادامنىڭ قولىنان قازا تاپتى.
«العاشىندا ولار ءجاي وتىرىپ اڭگىمەلەسكەن، كەيىن ەر ادام سپيرتتىك ىشىمدىك ءىشىپ الىپ، قىزعا قول جۇگىرتە باستاعان. باسىندا ايناگۇل ونى تىنىشتاندىرۋعا تىرىستى، ءبىراق انىق جانجال شىعاتىنى بەلگىلى بولعان كەزدە قىز 102 نومىرىنە حابارلاسقان. ءدامحانادا دەمالىپ وتىرعاندار جىگىتتىڭ قىزدى سىرتقا الىپ شىققانىن كورگەن، ءبىراق، ەشكىم اراشا تۇسپەگەن. قازىر ەشكىم ناقتى نە بولعانىن بىلمەيدى، الايدا، ارادا 20 مينۋت وتكەن سوڭ، قىز شاقىرعان پوليتسەيلەر كەلىپ، قىزدىڭ قايتىس بولعانىن كورگەن.
جىگىت ەشكىمدى ولتىرگىسى كەلمەگەنىن، قىزدى تەك يتەرىپ جىبەرگەنىن ايتادى. قىز بورديۋرگە باسىمەن قۇلاپ، جان تاپسىرعان. جىگىت قورقىپ قاشىپ كەتكەن، كەيىن قايتا كەلدى. ول جەدەل جاردەمدى شاقىرۋ ءۇشىن ەمەس، وزىمەن بىرگە الا كەتكەن قىزدىڭ ۇيالى تەلەفونىن قايتارۋ ءۇشىن. بۇل ۇرلىق پا؟ الدە ول، ەگەر قىزدىڭ تەلەفونىن وزىمەن الىپ كەتسە، ونىڭ سول كەشتە كىممەن كەشكى اس ىشكەنىن ەشكىم بىلمەي قالادى دەپ ويلادى ما؟ ول قىلمىسىن جاسىرعىسى كەلدى مە؟»، - دەپ جازدى ساندۋعاش دۇيسەنوۆا.
ول سونداي- اق مارقۇم ايناگۇلدىڭ تۋىستارىنىڭ پىكىرلەرىن جاريالادى.
«وقيعا وتكەن سوڭ قىزدىڭ اتا- اناسىنىڭ ۇيىنە ۇستالعان جىگىتتىڭ تۋىستارى كەلدى. «ولار كەشىرىم سۇرايدى، ءبىراق، ءبىزدىڭ قىزدى ولار ەمەس، ولاردىڭ ۇلدارى ءولتىردى عوي، ايتپاقشى، ول وتباسىنداعى جالعىز ۇل ەكەن، ءبىز كەشىرمەيمىز، ءبىز قىزىمىزدى جوعالتتىق جانە ول قىزىمىزدىڭ ءولىمى ءۇشىن جاۋاپ بەرۋى ءتيىس»، - دەپ جاتىر ايناگۇلدىڭ تۋىستارى.
«قاي اتا- انا جالعىز بالاسىنىڭ تۇرمەگە وتىرعانىن قالايدى. ءبىز ولاردىڭ بۇكىل تانىستارىن تارتىپ، ۇلدارىن تۇرمەدەن شىعارىپ الا ما دەپ قورقامىز، - دەپ ايناگۇلدىڭ اتا- اناسى الاڭداپ وتىر.
ساندۋعاش دۇيسەنوۆا ايناگۇلدىڭ ەڭبەكقور، فارماتسيەۆتيكالىق كومپانيانىڭ ديرەكتورىنا دەيىن وسكەنىن، قالعان ءومىرىن وزىنە ارنايتىن ساتتە، تراگەديالىق تۇردە قازا تاپقانىن جازدى.
«قىزدى كەشە جەرلەدى، اتا- اناسى قايعىدان ءالى بوي جازا الماي وتىر. تەك ادىلەتتىڭ ورناۋىن قالاپ وتىر»، - دەپ جازدى ول.
الماتى قالالىق پوليتسيا دەپارتامەنتى قىلمىستى جاساعان كۇدىكتى ۇستالىپ، قامالعانىن حابارلادى.
«اتالعان دەرەك بويىنشا تۇركسىب اۋداندىق پوليتسيا باسقارماسى ق ر ق ك- ءنىڭ 99-بابى 1-بولىگى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. قىلمىستى جاسادى دەگەن كۇدىكتى 1991 -جىلى تۋعان ت. ەسىمدى ازامات ۇستالدى جانە قاماۋعا الىندى. قىلمىستىق ءىستىڭ شەڭبەرىندە تەرگەۋ ارەكەتتەرى تەرگەۋدىڭ وبەكتيۆتىلىگى، جان- جاقتىلىعى جانە تولىقتىعى قاعيداتتارىن قاتاڭ ساقتاي وتىرىپ جۇزەگە اسىرىلادى. ساراپتاما تاعايىندالدى. تەرگەۋ بارىسى پوليتسيا دەپارتامەنتى باسشىلىعىنىڭ باقىلاۋىندا»، - دەپ حابارلادى قالالىق پوليتسيا دەپارتامەنتىنىڭ باسپا ءسوز قىزمەتى.
