الماتىدا جىلۋ قۇبىرى جارىلىپ، بىرنەشە ۇيدە ىستىق سۋ ءوشىرىلدى
الماتى. KAZINFORM - الماتىدا ساتبايەۆ پەن بايتۇرسىنوۆ كوشەلەرىنىڭ قيىلىسىندا جىلۋ قۇبىرى جارىلدى.
ونىڭ ۆيدەوسى الەۋمەتتىك جەلىدە تارادى.
«ساتبايەۆ پەن بايتۇرسىنوۆ كوشەلەرىنىڭ قيىلىسىندا جىلۋ قۇبىرى جارىلىپ، اسفالت وپىرىلىپ ءتۇستى. ساتبايەۆ كوشەسى ەكى جاققا دا جابىق»، - دەلىنگەن جازبادا.
«الماتى جىلۋ جەلىلەرى» ج ش س 4-مامىردا بايتۇرسىنوۆ كوشەسىنەن شىعىسقا قاراي ساتبايەۆ كوشەسىنىڭ بويىندا بولعان اپات ۋچاسكەسىندە جەدەل بريگادا جۇمىس ىستەپ جاتقانىن مالىمدەدى.
«1988 -جىلى توسەلگەن جانە ءوزىنىڭ نورماتيۆتىك مەرزىمىن وتەگەن ديامەترى 500 م م قۇبىردىڭ زاقىمدانۋىن جويۋ ءۇشىن ماسانشى - ساتبايەۆ - ماركوۆا - قۇرمانعازى كوشەلەرىنىڭ بويىنداعى ۇيلەرگە ىستىق سۋ بەرۋ ۋاقىتشا توقتاتىلدى. مۇنداعى جىلۋ قۇبىرىن جاڭارتۋ 2025 -جىلعا جوسپارلانعان، بيىل قايتا قۇرۋ جوباسى ساراپتامادان ءوتىپ جاتىر»، - دەپ اتاپ ءوتتى مەكەمەدەن.
تۇرعىن ۇيلەرگە ىستىق سۋ بۇگىن تۇندە بەرىلەدى.
«ازاماتتاردان ۋاقىتشا قولايسىزدىقتارعا تۇسىنىستىكپەن قاراۋدى سۇرايمىز»، - دەلىنگەن حابارلامادا.
