الماتىدا جەر سىلكىنىسىنەن جارىقشاق تۇسكەن ۇيلەردى تۇرعىندار ءوزى جوندەيدى

الماتى. KAZINFORM - تۇرعىنداردان جەر سىلكىنىسىنەن كەيىن ۇيىندە جارىقشاق پايدا بولعانى تۋرالى 188 شاعىم تۇسكەن، ونىڭ 70 ءى كوپقاباتتى ۇيلەردە. بۇل تۋرالى الماتى اكىمىنىڭ ورىنباسارى اسقار ءامرين ايتتى.

اسقار ءامريننىڭ سوزىنشە، بۇل ادام ومىرىنە قاۋىپ توندىرمەيدى. قۇرامىنا اكىمدىك وكىلدەرى مەن ساراپشىلار كىرگەن جۇمىس توبىنىڭ باعالاۋىنان كەيىن وسىنداي قورىتىندى شىعارىلعان.

جەر سىلكىنىسىنەن زارداپ شەككەن الەۋمەتتىك ينفراقۇرىلىم نىساندارى بيۋدجەت قاراجاتى ەسەبىنەن جوندەلەدى.

«كوپ قاباتتى تۇرعىن ءۇي كەشەنى، كوندومينيۋم نىساندارى اعىمداعى جوندەۋ جۇمىسىن جۇرگىزىپ، ءوز قاراجاتى ەسەبىنەن بۇل جارىقشاقتاردى جابادى. الەۋمەتتىك ينفراقۇرىلىمعا جاتاتىن نىساندار بيۋدجەت قاراجاتى ەسەبىنەن بەلگىلەنگەن تارتىپپەن قالپىنا كەلتىرىلەدى»، — دەدى اسقار ءامرين الماتى قالاسىن جوسپارلاۋ جوباسىن تانىستىرۋ بارىسىندا.

سونداي- اق ول وسى ايدا قازاق قۇرىلىس جانە ساۋلەت عىلىمي- زەرتتەۋ جانە جوبالاۋ ينستيتۋتىنىڭ ساراپشىلارى بۇكىل 188 نىسانعا ساراپتاما جۇرگىزىپ، رەسمي قورىتىندى بەرەتىنىن ايتتى.