الماتىدا جۇمىسسىز جاستارعا ارنالعان بوس ورىندار جارمەڭكەسى ءوتتى
الماتى. KAZINFORM - الماتى قالاسىنىڭ المالى اۋدانىندا جوعارى وقۋ ورىندارى مەن كوللەدجدەردىڭ تۇلەكتەرىن، سونداي- اق قالانىڭ جۇمىسسىز جاستارىن جۇمىسقا ورنالاستىرۋعا باعىتتالعان Almaly Career Day مانساپ كۇنى ءوتتى.
شارانى الماتى قالاسى جاستار ساياساتى باسقارماسى ۇيىمداستىردى.
المالى اۋدانىنىڭ اكىمى ارمان ءشامشيننىڭ مالىمەتىنشە، اۋداندا 14 پەن 35 جاس ارالىعىنداعى 83407 جاس تۇرادى.
«ونىڭ ىشىندە NEET جاستارىنىڭ ۇلەسى 4,7 مىڭ (%5,6). جاستاردى جۇمىسپەن قامتۋ - ولاردىڭ ەڭبەك نارىعىنا تابىستى ينتەگراتسيالانۋىن جانە ءوڭىردىڭ الەۋمەتتىك دامۋىن قامتاماسىز ەتۋ جولىنداعى ءبىز ءۇشىن ماڭىزدى تاقىرىپ. مۇنداي ءىس-شارالاردى وتكىزۋ جاستاردى قولداۋ جانە NEET ساناتىنداعى جاستاردى ازايتۋداعى ماڭىزدى قادام»، - دەدى المالى اۋدانىنىڭ اكىمى ارمان شامشين.
شاراعا IT، قارجى، ءبىلىم بەرۋ جانە ءارتۇرلى سالاداعى 70-تەن استام جەتەكشى كومپانيا مەن 2 مىڭنان استام جاس قاتىستى.
قاتىسۋشىلار اراسىندا بوس جۇمىس ورىندارىن ۇسىنۋعا دايىن ءىرى كورپوراتسيالار دا، پەرسپەكتيۆالى ستارتاپتار دا بولدى.
«جاستاردى جۇمىسپەن قامتۋ ءۇشىن قالالىق مانساپ ورتالىعى اشىلىپ، وزەكتى ماماندىقتار بويىنشا قىسقا مەرزىمدى كۋرستار باستالدى. «Jas Almaty» موبيلدى قوسىمشاسى ىسكە قوسىلدى. سونىمەن قاتار، قالامىزدىڭ ءار اۋدانىندا 8 كوميۋنيتي-ورتالىق اشىلدى. ءار ورتالىقتا جۇمىسقا ورنالاستىرۋ بويىنشا كونسۋلتانتتار كومەك كورسەتەدى. ءدال وسىنداي مانساپ كۇندەر ءار اۋداندا وتكىزۋ جوسپارلدا. كەلەسى مانساپ كۇنى 10-مامىردا مەدەۋ اۋدانىندا «كوك بازار» ساۋدا اۋماعىندا وتەدى»، - دەدى جاستار ساياساتى باسقارماسىنىڭ باسشىسى قايىرجان مەڭدىعاليەۆ.
ايتا كەتەيىك، مانساپ كۇندەرى - بۇل ۇزدىك كومپانيالار وزدەرىنىڭ بوس جۇمىس ورىندارى مەن دارىندى ماماندار ءۇشىن مۇمكىندىكتەرىن ۇسىناتىن الاڭ.
ايدىڭ سوڭىنا دەيىن وسىنداي بوس ورىندار جارمەڭكەسى قالامىزدىڭ بارلىق اۋداندارىندا وتەدى.
اۆتور
الما مۇقانوۆا
