الماتىدا جاستارعا ارنالعان جاساندى ينتەللەكت مەكتەبى اشىلدى
الماتى. KAZINFORM - المالى اۋدانىنداعى كوميۋنيتي ورتالىقتا جاستارعا ارنالعان جاساندى ينتەللەكت مەكتەبى جۇمىسىن باستادى.
الماتى قالاسى جاستار ساياساتى باسقارماسىنىڭ قولداۋىمەن IT Qazaq Community سەرىكتەستىگى جۇزەگە اسىرعان جوبا جاستاردىڭ سيفرلىق داعدىلارىن دامىتۋعا باعىتتالعان.
جاستار ساياساتى باسقارما باسشىسى ازيز قاجدانبەكتىڭ ايتۋىنشا، ءبىر ورتالىقتا باستالعان جوبا ءساتتى بولسا، مۇنداي كۋرستار بارلىق كوميۋنيتي ورتالىقتا ىسكە قوسىلادى.
- جاساندى ينتەللەكت - بولاشاقتىڭ تەحنولوگياسى. ونى جوققا شىعارۋعا بولمايدى. ويتكەنى ج ي كاسىپتە دە، IT سالاسىندا دا، وقۋ-ءبىلىم پروتسەسسىندە دە قولدانىسقا ەندى. 2025 -جىلدىڭ باسىندا وزىمىزگە جاستاردى وسى باعىتتا وقىتساق دەگەن ماقسات قويىپ، بۇگىن ونى ورىنداۋ ءۇشىن Qazaq Community قاۋىمداستىعىمەن مەموراندۋمعا قول قويدىق، - دەدى ول.
جوبا اياسىندا الماتى جاستارى جاساندى ينتەللەكت تەحنولوگيالارىن تەگىن ۇيرەنىپ، زاماناۋي AI- قۇرالدارىن مەڭگەرىپ، ولاردى وقۋ، زەرتتەۋ جانە بولاشاق كاسىبي قىزمەتىندە قولدانا الادى. باعدارلاما بويىنشا جاساندى ينتەللەكت قۇرالدارى تاجىريبە ءجۇزىندى وقىتىلىپ، ولاردى ناقتى قولدانۋ تاسىلدەرىن ۇيرەتىلەدى.
جاساندى ينتەللەكت كۋرستارىنا نيەت بىلدىرگەن جاستار المالى اۋدانىنداعى كوميۋنيتي ورتالىققا بارىپ قاتىسا الادى.
ەسكە سالايىق، بۇعان دەيىن پارلامەنت ماجىلىسىندە «جاساندى ينتەللەكت تۋرالى» زاڭ جوباسى مەن ىلەسپە قۇجات تانىستىرىلعانىن جازعانبىز. ول بويىنشا ادام مىنەز-قۇلقىن مانيپۋلياتسيالاي الاتىن ج ي قۇرۋعا تىيىم سالىنباق.
