الماتىدا جاسءوسپىرىم 5,6 ميلليارد تەڭگەنىڭ سيفرلىق اكتيۆتەرىنىڭ زاڭسىز اينالىمىن ۇيىمداستىرعان
استانا. KAZINFORM - قارجىلىق مونيتورينگ اگەنتتىگىنىڭ الماتى قالاسى بويىنشا دەپارتامەنتى ءتيىستى رۇقسات قۇجاتتارىنسىز سيفرلىق اكتيۆتەردىڭ زاڭسىز اينالىمىنا قاتىستى ءىستىڭ تەرگەۋىن اياقتادى.
اگەنتتىكتىڭ باسپا ءسوز قىزمەتىنىڭ حابارلاۋىنشا، 2020 -جىلى قىركۇيەكتە، كامەلەتتىك جاسقا تولماعان كۇدىكتى «Telegram» مەسسەندجەرى مەن «OLX» پلاتفورماسىندا ايىرباستاۋ وپەراتسيالارىن جۇرگىزەتىنى تۋرالى حابارلاندىرۋلار ورنالاستىرعان.
«Binance» كريپتوبيرجانىڭ پايدالانۋشىلارى تەك ەرەسەكتەر بولا الاتىندىقتان، ول اككاۋنت جاساۋ ءۇشىن اعاسىنا ۆەريفيكاتسيادان ءوتۋىن سۇراعان.
2021 -جىلى ول اينالىم سومالارىن بولشەكتەۋ جانە بۇعاتتاۋ تاۋەكەلىن تومەندەتۋ ءۇشىن ءوزىنىڭ تۋىستارىنىڭ اتىنا قوسىمشا تاعى ءۇش اككاۋنت تىركەگەن.
ناتيجەسىندە 2021-2024 -جىلدار ارالىعىندا جالپى سوماسى 5,6 ميلليارد تەڭگە سيفرلىق اكتيۆتەردى زاڭسىز اينالىمىن جاساعان.
كورسەتكەن قىزمەتى ءۇشىن الىنعان سىياقى مولشەرى %0,5 دان %2,5عا دەيىن قۇراعان.
كۇدىكتى ءوزىنىڭ زاڭسىز تابىسىنا Mitsubishi اۆتوكولىگىن ساتىپ العان، سوتتىڭ شەشىمىمەن وسى اۆتوكولىككە تىيىم سالىندى.
سوت ۇكىمىمەن ول ق ر ق ك 214-بابىنىڭ 2-بولىگى 2-تارماعىمەن (زاڭسىز كاسىپكەرلىك، اسا ءىرى مولشەردە تابىس الۋمەن ۇشتاسقان) كىنالى دەپ تانىلىپ، 2,5 جىلعا ەركىندىگىن شەكتەۋ جازاسىنا كەسىلگەن.
سونداي-اق، مەملەكەت كىرىسىنە 5172 USDТ سيفرلىق اكتيۆتەرى مەن Mitsubishi اۆتوكولىگى تاركىلەندى.
اتاپ ءوتۋ كەرەك، زاڭسىز كريپتو ايىرباستاۋ ورىندارى ءوز كليەنتتەرىن سايكەستەندىرمەيدى جانە كۇدىكتى وپەراتسيالاردى انىقتامايدى. سوندىقتان، ولاردىڭ قىزمەتتەرىن كوبىنە كيبەرالاياقتار مەن ەسىرتكى زاتتارىن وتكىزۋشىلەر پايدالانادى.
- ەسكە سالايىق، 2024 -جىلى جالپى اينالىمى 60 ميلليارد تەڭگەنى قۇرايتىن 36 زاڭسىز كريپتو ايىرباستاۋ پۋنكتى جويىلدى. 4,8 ميلليون USDT (شامامەن 2,5 ميلليارد تەڭگە) سوماسىنا اكتيۆتەر بۇعاتتالىپ، تاركىلەنگەن. قازاقستان رەسپۋبليكاسىنىڭ «سيفرلىق اكتيۆتەر تۋرالى» زاڭىنا سايكەس ەلدەگى سيفرلىق اكتيۆتەردىڭ اينالىمىنا قاتىستى كەز كەلگەن قىزمەت ليتسەنزيانى قاجەت ەتەدى، - دەلىنگەن حابارلامادا.
