الماتىدا جاڭا مەترو بەكەتىن سالۋ ءۇشىن جەر ۋچاسكەلەرى ساتىپ الىنادى
الماتى. KAZINFORM - الماتىدا 126 جەر ۋچاسكەسىن ساتىپ الۋ ءۇشىن بيۋدجەتتەن 9 ميلليارد تەڭگە بولىنەدى. الىنعان ۋچاسكەلەر قولدانىستاعى كوشەلەردى كەڭەيتۋ جانە جاڭا مەترو بەكەتىن سالۋعا قاجەت.
الماتى قالالىق قارجى باسقارماسىنىڭ باسشىسى قانات سۋحامبەكوۆتىڭ ايتۋىنشا، كولىك ينفراقۇرىلىمىن قارجىلاندىرۋعا 13,9 ميلليارد تەڭگە قاراستىرىلعان.
«مەگاپوليستىڭ كولىك قاتىناسىن جاقسارتۋ ماقساتىندا سەيفۋللين-جانسۇگىروۆ داڭعىلىنداعى جولايىرىقتىڭ قۇرىلىسى جالعاسادى. جاڭا جولايىرىقتا كولىك قوزعالىسى وسى جىلدىڭ قازان ايىندا اشىلادى دەپ جوسپارلانۋدا. جالپى 126 جەر ۋچاسكەسىن ساتىپ الۋ ءۇشىن 9 ميلليارد تەڭگە بولىنەدى. الىنعان ۋچاسكەلەر قولدانىستاعى كوشەلەردى كەڭەيتۋ جانە جاڭا مەترو بەكەتىن سالۋعا قاجەت»، - دەدى ول.
قالالىق موبيلدىلىك باسقارماسىنىڭ باسشىسى ساعىندىق تەلىبايەۆ سەيفۋللين- جانسۇگىروۆ جولايرىعىن ىسكە قوسۋ ءبىرقاتار كوشەنىڭ وتكىزۋ قابىلەتىن ورتا ەسەپپەن %15-20 عا ارتتىرۋعا مۇمكىندىك بەرەتىنىن اتاپ ءوتتى.
«سەيفۋللين داڭعىلى مەن جانسۇگىروۆ كوشەسىنىڭ قيىلىسىندا جولايرىعىن سالۋ سەيفۋللين داڭعىلىندا وتكىزۋ قابىلەتىن %15-20 عا، جانسۇگىروۆ كوشەسى بويىنشا %15 عا ارتتىرۋعا مۇمكىندىك بەرەدى دەپ كۇتىلۋدە. قازىر «باتىس» جانە «شىعىس» وتكەلدەرىندە تروتۋارلاردى ورناتۋ، ينجەنەرلىك جەلىلەردى قايتا قۇرۋ، سونداي-اق جەر ءۇستى جاياۋ جۇرگىنشىلەر جولىن سالۋ بويىنشا جۇمىستار جۇرگىزىلىپ جاتىر»، - دەدى باسقارما باسشىسى.
