الماتىدا جاڭا كونگرەسس-ورتالىقتىڭ قۇرىلىسى نەگە باستالماي تۇر

الماتى. KAZINFORM - الماتى اكىمى ەربولات دوسايەۆ مەدەۋ اۋدانىنىڭ تۇرعىندارىمەن كەزدەستى.

كەزدەسۋ بارىسىندا تۇرعىن مەدەۋ اۋدانىندا قۇرىلىسى جوسپارلانعان كونگرەسس-ورتالىقتىڭ قۇرىلىسى قانشالىقتى زاڭدى ەكەنىن سۇرادى.

- كونگرەسس-ورتالىق مەملەكەت يەلىگىندە بولادى. جەرگىلىكتى بيۋجەت قاراجاتى ينجەنەرلىك جەلىلەر مەن اباتتاندىرۋ جۇمىستارىنا جۇمسالادى. سونىمەن قاتار الەۋمەتتىك جاۋاپكەرشىلىك شەڭبەرىندە جەكە ينۆەستورلاردىڭ قاراجاتى تارتىلادى. ءبىز تەك زاڭ جۇزىندە جۇمىس ىستەيتىن بولامىز. ونداعى جەردى بەلگىلەنگەن باعامەن ساتىپ الامىز. وعان كەلىسپەگەن ادامداردىڭ سوتقا شاعىمدانۋعا قۇقىعى بار. ءبىز 13 جەر يەسىمەن كەلىسىمشارت جاساسىپ قويدىق. باستىسى جوبا ءۇشىن قاجەتتى جەردىڭ باسىم بولىگى قالانىڭ يەلىگىندە. تەك جوبانى تولىق ىسكە اسىرۋ ءۇشىن قوسىمشا اۋماقتى ساتىپ الۋ قاجەت. سوت قانداي شەشىم شىعارسا، سوعان قاراي ءبىز جەر يەلەرىنە تولەم جاسايمىز. ەشقانداي زاڭ نورمالارىن بۇزبادىق، بۇل شىنىمەن مەملەكەت قاجەتتىلىگى، - دەدى قالا اكىمى.

سونداي-اق ەربولات دوسايەۆ كونگرەسس-ورتالىق ءۇشىن الىناتىن اۋماقتا ەشقانداي كوممەرتسيالىق نىسان سالىنبايتىنىن اتاپ ءوتتى.

- قالادا كونگرەسس-ورتالىق جوق، سوندىقتان ءبىز ونى سالامىز. ال مۇندا كوممەرتسيالىق نىسان سالىنادى دەگەن الىپ- قاشپا سوزدەر شىندىققا جاناسپايدى. كەڭەس وداعى كەزىنەن بەرى الماتىدا رەسپۋبليكا سارايىنان باسقا نىساندار سالىنباعان. ەكىنشى، وندا 21 گەكتەر اۋماعىندا ساياباق بولادى، ويتكەنى قالانىڭ جوعارى جاعىندا ساياباقتار جەتىسپەيدى، - دەدى ول.

ەسكە سالايىق، 2019-جىلى «الماتى قالاسىن دامىتۋ 50 درايۆەر-جوباسى» اياسىندا قالادا زاماناۋي كونگرەسس-ورتالىق سالىناتىنى حابارلانعان ەدى.