الماتىدا جاڭا جاعالاۋ پايدا بولادى
الماتى. KAZINFORM - الماتى قالاسىنىڭ ناۋرىزباي اۋدانىندا «الماتى - ءبىزدىڭ ورتاق ءۇيىمىز» ناۋقانى اياسىندا 7,7 شاقىرىمعا سوزىلىپ جاتقان «قارعالى» وزەنىنىڭ جاعالاۋى قايتا جاڭارتىلىپ جاتىر.
الماتى اكىمدىگىنىڭ مالىمەتىنشە، اكسيانىڭ ءۇشىنشى اپتاسى «ءبىزدىڭ قالا - ءبىزدىڭ تاۋلار، وزەندەر مەن كولدەر» ۇرانى اياسىندا ءوتىپ جاتىر. وسى ۋاقىت ىشىندە جاعالاۋلار مەن سۋ ايدىندارى، ساياباقتار، سكۆەرلەر مەن تاۋ بوكتەرى تازارتىلادى.
قارعالى جوباسىنىڭ ماقساتى - بۇل ايماقتىڭ ەكوجۇيەسىن ساقتاي وتىرىپ، قالا تۇرعىندارىنىڭ دەمالۋى ءۇشىن نەعۇرلىم ىڭعايلى ءارى تارتىمدى ورتا جاساۋ.
«مۇندا وزەن ارناسىن تازارتىپ، سەرۋەندەۋ ايماعىن قۇرۋ جوسپارلانعان. 3 مىڭعا جۋىق اعاش وتىرعىزىلادى. سونداي-اق كوپجىلدىق گۇلدەر مەن شوپتەردىڭ گۇلزارى، قىلقان جاپىراقتى جانە جاپىراقتى اعاشتار مەن بۇتالار ەگىلەدى. جالپى ۇزىندىعى 2,7 شاقىرىمعا جەتەتىن سۋارمالى سۋ قۇبىرى تارتىلادى»، - دەپ اتاپ ءوتتى اكىمدىكتەن.
سونداي-اق جاعالاۋعا ۇزىندىعى 4,3 شاقىرىم بولاتىن 196 جارىق باعاناسى ورناتىلادى. كەلۋشىلەردىڭ جايلىلىعى ءۇشىن 135 ورىندىق پەن قوقىس جاشىگىنە قويۋ جوسپاردا.
باستى ماقسات - بالالار مەن سپورت الاڭدارى، جاياۋ ءجۇرۋ جولدارى مەن وزەن جاعاسىندا دەمالۋ مۇمكىندىگى بار جاڭا قوعامدىق كەڭىستىك قۇرۋ. اتكەنشەك، سىرعاناق جانە ورمەلەۋ سياقتى اشىق ويىن ەلەمەنتتەرى بالالاردىڭ موتوريكاسى مەن فيزيكالىق بەلسەندىلىگىن ارتتىرادى.
بالالارعا ارنالعان قۇمسالعىشتار مەن سۋ ايماقتارىن، سونداي-اق اتا-انالارعا ارنالعان ورىندىقتارى مەن ۇستەلدەرى بار دەمالىس ايماعىن قۇرۋ جوسپاردا.
ەرەكشە بالالار ءۇشىن دە ويىن الاڭدارىندا ينكليۋزيۆتى ەلەمەنتتەر قويىلاتىن بولادى.
كوپىر جولىن قايتا قۇرىپ، جاياۋ جۇرگىنشىلەر مەن ۆەلوسيپەدشىلەرگە قاۋىپسىزدىك پەن قولجەتىمدىلىك قامتاماسىز ەتىلمەك. تروتۋارلار مەن ۆەلوسيپەد جولدارىن ورناتۋ قاراستىرىلعان.
بۇل جوبا «قارعالى» وزەنىنىڭ جاعالاۋىن قالا شەتىندەگى بىرەگەي تابيعي ساياباققا اينالدىرادى.
قۇرىلىس جۇمىستارىن 2024 -جىلدىڭ قاراشا ايىنا دەيىن اياقتاۋ جوسپاردا بار.
«الماتى - ءبىزدىڭ ورتاق ءۇيىمىز» ناۋقانى تۋرالى بارلىق اقپارات Almaty.kz سايتىندا، الماتى اكىمدىگىنىڭ الەۋمەتتىك جەلىلەرىندە ورنالاستىرىلعان. سونداي- اق، ۆەب- سايتقا قالا بويىنشا باننەرلەردە، پلاكاتتاردا ارنايى ورنالاستىرىلعان QR-كود ارقىلى دا كىرۋگە بولادى.
اۆتور
الما مۇقانوۆا
