الماتىدا حوستەلدە بولعان ءورت تۋرالى سوڭعى مالىمەتتەر

الماتىدا حوستەل ورتەنىپ، 13 ادام قايتىس بولدى. وقيعا ورىنان Kazinform اگەنتتىگىنىڭ ءتىلشىسى الما مۇقانوۆا اقپارات تاراتتى. سوڭعى مالىمەتتەر بويىنشا، قازاق تاپقانداردىڭ توعىزى - قازاقستاندىق، قالعانى شەتەلدىكتەر.

الماتىدا حوستەل ورتەنىپ، 13 ادام قازا تاپتى. قالالىق توتەنشە جاعدايلار دەپارتامەنتىنىڭ مالىمەتىنشە، ءورت تۋرالى حابارلاما 30-قاراشا كۇنى ساعات 05:33-تە تۇسكەن. ءبىرىنشى ءورت ءسوندىرۋ ءبولىمى شاقىرتۋ ورنىنا 7 مينۋت ىشىندە جەتتى.

«كەلگەن بويدا 1-قاباتى جانە جەرتولەسى جاتاقحاناعا اينالعان 3 قاباتتى تۇرعىن ءۇيدىڭ جانىپ جاتقانى انىقتالدى. الدىن الا اقپارات بويىنشا ءورتتىڭ جالپى اۋدانى - 30 شارشى مەتر. قابىلدانعان شارالارمەن ءورت 06:22-دە جويىلدى»، - دەپ حابارلادى دەپارتامەنتتەن.

ورتتەن زارداپ شەككەن 2 ادام قالالىق جەدەل شۇعىل كومەك كورسەتۋ اۋرۋحاناسىنا جەتكىزىلدى. قالالىق دەنساۋلىق ساقتاۋ باسقارماسىنىڭ مالىمەتىنە سايكەس، ناۋقاستىڭ بىرىنە كومىرقىشقىل گازىنان ۋلانۋ دياگنوزى قويىلدى.

«ونىڭ جاعدايى ورتاشا اۋىرلىقتا، تۇراقتى دەپ باعالانىپ وتىر. ەكىنشى ناۋقاس بارلىق تەكسەرۋدەن كەيىن ۇسىنىستارمەن امبۋلاتورلىق ەمدەلۋگە جىبەرىلدى»، - دەپ حابارلادى ۆەدومستۆودان.

حوستەلدەن 59 ادام ەۆاكۋاتسيالانىپ، 56 سى جاقىن ماڭداعى مەكتەپكە ۋاقىتشا ورنالاستىرىلدى.

«قازىر 56 ادام جاقىن ماڭداعى مەكتەپكە ۋاقىتشا ورنالاستىرىلدى. ىستىق تاماق بەرىلدى، قاجەتتى مەديتسينالىق جانە پسيحولوگيالىق كومەك تولىق كولەمدە كورسەتىلەدى. ءبىر ساعات ىشىندە اۋداننىڭ قوناق ۇيلەرىنە ورنالاستىرىلادى»، - دەپ حابارلادى قالالىق اكىمدىكتەن.

الماتى قالالىق توتەنشە جاعدايلار دەپارتامەنتىنىڭ باسشىسى نۇرلان اتىعايەۆتىڭ ايتۋىنشا، ەۆاكۋاتسيالانعان ادامداردىڭ كوبى - شەتەلدىكتەر.

«حوستەل اكىمشىلىگىنىڭ سوزىنشە، ءوز بەتىمەن سىرتقا شىققان ادامداردىڭ دەنى وزبەكستان، قىرعىزستان، پاكىستان ەلدەرىنىڭ ازاماتتارى. ارالارىندا قازاقستاندىقتار دا بار. قازا تاپقانداردىڭ كىم ەكەنى انىقتالىپ جاتىر»، - دەدى ول.

ءورت بولعان حوستەلدەگى ءبىر ورىن قۇنى 2000 تەڭگەدەن باستالعان.

المالى اۋدانىنىڭ اكىمى ايدار جاقىبايەۆتىڭ ايتۋىنشا، حوستەلدە تۇرعانداردىڭ دەنى - ستۋدەنتتەر مەن جاس جۇمىسشىلار. پاكىستان مەن ءۇندىستاننان كەلگەن مەديتسينا ۋنيۆەرسيتەتىنىڭ ستۋدەنتتەرى دە بار.

ق ر پرەمەر-ءمينيسترى ءاليحان سمايىلوۆتىڭ وكىمىمەن ءورت سەبەبىن تەكسەرۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.

الماتى اكىمدىگى تاراتقان مالىمەتكە سايكەس، ءادي ءشارىپوۆ كوشەسىندەگى «الماتى حوستەل»  Halyk Bank مەنشىگىندەگى عيماراتتا ورنالاسقان.

اكىمدىك مالىمەتى بويىنشا، قازا تاپقانداردىڭ كوبى - قازاقستاندىقتار.

ءورتتىڭ شىعۋ سەبەپتەرىن تەكسەرۋ ءۇشىن مينيستر، گەنەرال-مايور سىرىم ءشارىپحانوۆتىڭ باسشىلىعىمەن ت ج م-نىڭ جەدەل توبى وقيعا ورنىنا اتتاندى. ق ر قىلمىستىق كودەكسىنىڭ 292-بابىنا سايكەس قىلمىستىق ءىس تىركەلدى.

الماتى قالاسىنىڭ توتەنشە جاعدايلار دەپارتامەنتى شۇعىل جەلىنى ىسكە قوستى.

قازا تاپقانداردىڭ توعىزى - قازاقستاندىق، قالعانى شەتەلدىكتەر.

الماتىداعى حوستەلدە تۇرىپ جاتقان ستۋدەنتتەر ءورت باستالعان كەزدە عيماراتتان قالاي شىققانىن ايتىپ بەردى.

اۆتور

گۇلنۇر عازيز قىزى