الماتىدا شەتەلدىك تۋريستەر ورتا ەسەپپەن 5 كۇن بولادى

الماتى. قازاقپارات - Almaty Tourism Bureau مەگاپوليسكە كەلەتىن تۋريستەر جايلى زەرتتەۋ ناتيجەسىمەن ءبولىستى. بيۋرو 1200 شەتەلدىك تۋريستەن ساۋالناما جۇرگىزگەن.

ۇلتتىق ستاتيستيكا بيۋروسىنىڭ مالىمەتىنە سايكەس، وسى جىلدىڭ 6 ايىندا الماتىعا 1070358 تۋريست كەلگەن. ونىڭ ىشىندە ىشكى تۋريستەردىڭ ۇلەسى - 768 مىڭ، ال شەتەلدىك قوناقتار - 302 مىڭ.

الماتى تۋريزم بيۋروسى ماركەتينگ جانە ساراپتاما ءبولىمىنىڭ جەتەكشىسى رۋسلان جانابايەۆ ىشكى جانە شەتەلدىك تۋريستەردىڭ ايىرماشىلىقتارىن اتاي وتىرىپ، بيۋرو جۇرگىزگەن زەرتتەۋ ناتيجەسىمەن ءبولىستى.

- الماتىعا كەلەتىن شەتەلدىك قوناقتار نەگىزىنەن 26-35 جاس ارالىعىنداعى ەر ادامدار. ولاردىڭ %40 ى جالعىز، %30 ى دوستارىمەن جانە %30 ى وتباسىمەن كەلەدى. الماتىدا ورتا ەسەپپەن 5 كۇن بولادى جانە ءار كۇن سايىن ورتا ەسەپپەن 334 ا ق ش دوللارىن جۇمسايدى. تۋريستەردىڭ %68 ى دەمالۋعا، %32 ى ىسكەرلىك ماقساتتا كەلەدى. جۇمسالعان قاراجاتتىڭ %50 ى جاتىن ورىنعا كەتەدى، - دەدى ول.

سونداي-اق، رۋسلان جانابايەۆ ەلىمىزدىڭ مادەني استاناسىنا قىدىرىپ كەلەتىن ىشكى تۋريستەرگە دە توقتالدى. ونىڭ ايتۋىنشا، قازاقستاندىقتار شەتەلدىك قوناقتارعا قاراعاندا 8,7 ەسە از اقشا جۇمسايدى.

- الماتىعا كەلەتىن ىشكى تۋريستەردىڭ ورتا جاسى 18-25 جاس ارالىعىندا. ولاردىڭ %68 ى تۋىسقاندارىنىڭ ۇيىندە توقتايدى. ورتا ەسەپپەن قالادا 2 كۇن بولادى جانە ورتا ەسەپپەن 38 دوللار جۇمسايدى. ياعني، شەتەلدىك تۋريستەرگە قاراعاندا 8,7 ەسە از قاراجات كەتەدى. وسى سەبەپتى ءبىز قازىر ىشكى تۋريستەرگە قاراعاندا شەتەلدىك قوناقتاردى شاقىرۋعا تىرىسامىز. جاي عانا شەتەلدىك ەمەس، جوسپارلى تۇردە كەلەتىن قالتالى تۋريستەردى شاقىرۋ بويىنشا جۇمىستار جۇرگىزەمىز، - دەدى بيۋرو وكىلى.

ەسكە سالايىق، بۇعان دەيىن الماتىعا كەلگەن شەتەلدىك تۋريستەر قايتادان تۋريستىك جارنا تولەۋى مۇمكىن ەكەنىن جازعانبىز.