الماتىدا شەتەل ازاماتىنان 2 مىڭعا جۋىق تەلەفون كارتا تاركىلەندى
استانا. قازاقپارات - ءۇي-جايدى تەكسەرۋ بارىسىندا جەدەل ۋاكىلدەر ءۇش sim-box قۇرىلعىسىن تاپتى. الماتىدا شەتەل ازاماتىنان 2 مىڭعا جۋىق sim كارتا تاركىلەندى.

الماتى قالاسىندا ىشكى ىستەر مينيسترلىگى كيبەرقىلمىسقا قارسى ءىس- قيمىل ءبولىنىسى جالدامالى پاتەردە تاياۋ شەت ەلدەردىڭ ءبىرىنىڭ ازاماتىن ۇستادى.
«ءۇي-جايدى تەكسەرۋ بارىسىندا جەدەل ۋاكىلدەر ءۇش sim-box قۇرىلعىسىن تاپتى. ولاردىڭ ءارقايسىسىندا 32 sim كارتا سلوتى بولعان. سونداي-اق ءارتۇرلى ۇيالى بايلانىس وپەراتورلارىنىڭ ەكى مىڭعا جۋىق sim كارتاسى تاركىلەندى. قۇرىلعىلاردىڭ كومەگىمەن قازاقستاندىقتارعا الاياقتىق قوڭىراۋلار جاسالعان. شەتەلدىك ازاماتتىڭ ءبىزدىڭ ەلگە بىلتىر جەلتوقسان ايىندا كەلىپ، الاياقتىق ارەكەتتەر جاساۋ ءۇشىن اتالمىش جابدىقتارعا قىزمەت كورسەتۋمەن اينالىسقانى انىقتالدى. قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى»، - دەدى ءى ءى م كيبەرقىلمىسقا قارسى ءىس- قيمىل دەپارتامەنتىنىڭ باستىعى جاندوس ءسۇيىنباي.
ءىنجۋ ءاليحان