الماتىدا ءبىر ايدا 6 بالا تەرەزەدەن قۇلاپ كەتكەن
الماتى. KAZINFORM - وڭىرلىك كوممۋنيكاتسيالار قىزمەتىنىڭ الاڭىندا الماتى قالاسى توتەنشە جاعدايلار دەپارتامەنتى باستىعىنىڭ ورىنباسارى باعدات چايزادا ەلىمىزدە جىل باسىنان بەرى 150 دەن استام بالا تەرەزەدەن قۇلاپ كەتكەنىن ايتتى.
قالالىق ت ج د مالىمەتىنە سايكەس، الماتىدا وسى جىلدىڭ 8 ايىندا بالانىڭ تەرەزەنىڭ قۇلاپ كەتۋى بويىنشا 11 جاعداي تىركەلگەن. ونىڭ التاۋى بيىل تامىز ايىندا بولعان.
«بالالار ءتۇرلى جاراقاتتارمەن، سونىڭ ىشىندە اۋىر جاراقاتتارمەن اۋرۋحاناعا جاتقىزىلدى. ابىروي بولعاندا، بۇلدىرشىندەر جازىلىپ، ۇيلەرىنە جىبەرىلدى»، - دەدى باعدات چايزادا.
سونداي-اق ونىڭ ايتۋىنشا، 5 وقيعا - اتا-انالار مەن قامقورشىلاردىڭ بالالاردى قاراۋسىز قالدىرۋىنان، بىرەۋى - اتا-انانىڭ قىراعىلىق تانىتپاۋى سەبەبىنەن تۋىنداعان. سوڭعى جاعدايدا، بالانىڭ 38 جاستاعى اكەسى تاڭەرتەڭ باسقا بولمەدە ۇيىقتاپ جاتقان.
- سوڭى قايعىلى اياقتالىپ جاتاتىن جازاتايىم وقيعالاردىڭ نەگىزگى سەبەبى - بالالاردى قاراۋسىز قالدىرۋ جانە كوپ قاباتتى تۇرعىن ۇيلەردىڭ تەرەزەلەرىندە قورعانىس قۇرالدارىنىڭ بولماۋى، - دەدى ول.
اۆتور
الما مۇقانوۆا
