الماتىدا بيىل ايەلدەرگە قاتىستى 7 مىڭ قىلمىس تىركەلگەن
الماتى. KAZINFORM - الماتىدا 2024-جىلدىڭ 10 ايى بويىنشا ايەلدەردى زورلىق-زومبىلىقتان قورعاۋ جونىندەگى توپتىڭ جۇمىسى قورىتىندىلاندى.
بريفينگكە «داعدارىس ورتالىقتارى وداعى» زاڭدى تۇلعالار بىرلەستىگىنىڭ باسقارما ءتوراعاسى زۋلفيا بايساكوۆا جانە المالى اۋدانى پوليتسيا باسقارماسىنىڭ ايەلدەردى زورلىق-زومبىلىقتان قورعاۋ بولىمشەسىنىڭ اعا ينسپەكتورى، پوليتسيا مايورى ايگەريم كۋلاسبەكوۆا قاتىستى.
ۇسىنىلعان پوليتسيانىڭ مالىمەتىنە سايكەس، 2024-جىلدىڭ 10 ايىندا الماتىدا ايەلدەرگە قاتىستى 7705 قىلمىس تىركەلگەن، بۇل وتكەن جىلدىڭ سايكەس كەزەڭىمەن سالىستىرعاندا %8,1 عا از.
- بيىل ءبىز وتباسىلىق- تۇرمىستىق زورلىق-زومبىلىقتىڭ الدىن الۋ بويىنشا جۇمىستى كۇشەيتتىك. پروفيلاكتيكالىق ەسەپكە 6800 دەن استام ادام قويىلدى، 6200 دەن استام قورعانىس ۇيعارىمدارى شىعارىلدى. ايتا كەتۋ كەرەك، بۇل شارالار تەك قۇقىق بۇزۋشىلىقتاردىڭ جولىن كەسۋدى عانا ەمەس، سونىمەن بىرگە زارداپ شەككەندەرگە كومەك كورسەتۋدى كوزدەيدى. «سەرىكتەستىك-تۇرمىستىق زورلىق-زومبىلىقتىڭ الدىن الۋ قۇرالى» پيلوتتىق جوباسى اياسىندا 105 ەر ادام پسيحوكوررەكتسيالىق باعدارلامالارعا جىبەرىلدى، - دەدى پوليتسيا وكىلى.
سونداي-اق ول اقپاراتتىق-ءتۇسىندىرۋ جۇمىستارىنا ەرەكشە كوڭىل بولىنگەنىن اتاپ ءوتتى. 2024-جىلى قالانىڭ وقۋ ورىندارى مەن ۇيىمدارىندا 160 ءدارىس، ترەنينگتەر مەن كەزدەسۋلەر وتكىزىلگەن، ولارعا 1000 نان استام تۇرعىن قاتىستى.
سونىمەن قاتار ايەلدەردى زورلىق- زومبىلىقتان قورعاۋ جونىندەگى ينسپەكتورلار 776 ايەلگە كونسۋلتاتسيالىق كومەك كورسەتكەن. داعدارىس ورتالىقتارىنا 150 ايەل جىبەرىلسە، ولاردىڭ 45 ءى بالالارىمەن بىرگە «جان-سايا» داعدارىس ورتالىعىن پانالادى، 9 ايەل «انالار ءۇيى» باسپاناسىنان قولداۋ تاپتى.
- ايەلدەرگە قاتىستى زورلىق-زومبىلىقپەن كۇرەسۋ - بۇل قۇقىق قورعاۋ ورگاندارىنىڭ مىندەتى عانا ەمەس، سونىمەن بىرگە قوعامنىڭ جالپى جاۋاپكەرشىلىگى. داعدارىس ورتالىقتارىمەن، ۇكىمەتتىك ەمەس ۇيىمدارمەن جانە مەملەكەتتىك ورگاندارمەن بىرلەسىپ ءبىز زارداپ شەككەندەردىڭ الدىن الۋعا جانە ولارعا كومەك كورسەتۋگە باعىتتالعان بەلسەندى جۇمىستى جالعاستىرامىز، - دەدى زۋلفيا بايساكوۆا.
ەسكە سالايىق، بۇعان دەيىن الماتى وبلىسىندا بالعامەن ايەلىنىڭ باسىن جارعان ەر ادام ۇستالعانىن جازعانبىز.
