الماتىدا بىلتىر قانشا ادام اعزاسىن اۋىستىردى

الماتى. قازاقپارات - 2023 -جىلى وڭتۇستىك استانادا مىندەتتى الەۋمەتتىك مەديتسينالىق ساقتاندىرۋ ەسەبىنەن اعزا مۇشەسىن ترانسپلانتتاۋ بويىنشا 83 وپەراتسيا جاسالدى. بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا مەديتسينالىق ساقتاندىرۋ قورىنىڭ الماتى قالالىق فيليالى ديرەكتورى ءىلياس مۇحامەدجان ايتتى.

فيليال ديرەكتورىنىڭ ايتۋىنشا، مىندەتتى مەديتسينالىق ساقتاندىرۋ پاكەتىندەگى مەديتسينالىق قىزمەت كورسەتۋ اياسى وتە كەڭ جانە ول بارلىق ساقتاندىرىلعان ازاماتتارعا قولجەتىمدى.

«بىلتىر قۇنى 551,8 ميلليون تەڭگەدەن اساتىن 83 ترانسپلانتاتسيا جاسالدى. مۇنداي ءبىر عانا وتانىڭ ءوزى ورتا ەسەپپەن العاندا 7-9 ميلليون تەڭگە تۇرادى. وسى قىزمەتتەردىڭ ءبارىن ساقتاندىرىلعان ازاماتتار ءمامس ارقىلى قيىندىقسىز پايدالانىپ كەلەدى»، - دەيدى ءىلياس مۇحامەدجان.

وسىعان دەيىن الماتىدا قايتىس بولعان 53 جاستاعى ايەلدىڭ ءتورت ادامعا دونور بولعانى تۋرالى جازعان ەدىك. ونىڭ جۇرەگى 23 جاستاعى جاس جىگىتتىڭ ءومىرى ساقتاپ قالدى.

قازىر قازاقستاندا 4000-نان استام ناۋقاس اعزا اۋىستىرۋعا مۇقتاج. ونىڭ ىشىندە بۇيرەككە 3661 ەرەسەك، 85 بالا، باۋىرعا - 180 ەرەسەك، 10 بالا، وكپەگە - 20 ەرەسەك، جۇرەككە - 136 ەرەسەك، 5 بالا جانە جۇرەك-وكپە كەشەنىنە 4 ەرەسەك پەن 2 بالا مۇقتاج.

اۆتور
الما مۇقانوۆا