الماتىدا بەيبىت ميتينگ وتكىزۋ ءتارتىبى وزگەرەدى

الماتى ءماسليحاتى مەگاپوليستە بەيبىت جيىن ۇيىمداستىرۋ جانە وتكىزۋ ءۇشىن ارنايى ورىنداردى پايدالانۋ ءتارتىبىن وزگەرتەتىن شەشىم جوباسىن ازىرلەدى، دەپ حابارلايدى Kazinform.

ءماسليحاتتىڭ شەشىمىمەن الماتى قالاسىندا بەيبىت جيىن ۇيىمداستىرۋ جانە وتكىزۋ ءۇشىن ارنايى ورىنداردى، سونداي-اق ارنايى ورىنداردى پايدالانۋ ءتارتىبىن ايقىنداۋ تۋرالى 2020-جىلعى 23- ماۋسىمداعى 462№ شەشىمىنىڭ 5-تارماعىنا وزگەرىس ەنگىزىلدى.

«5-تارماق مىناداي رەداكسيادا جازىلسىن: زاڭنىڭ 9-بابى 5-تارماعىندا كوزدەلگەن وبەكتىلەردىڭ ىرگەلەس اۋماقتارىنان كەمىندە 400 مەتر اراقاشىقتىق شەكارامەن ايقىندالسىن. وسى شەشىم العاش رەسمي جاريالانعان كۇننەن كەيىن كۇنتىزبەلىك ون كۇن وتكەندە قولدانىسقا ەنگىزىلەدى» دەلىنگەن جازبادا.

قۇجات 2024-جىلدىڭ 10- قاڭتارىنا دەيىن اشىق ن ق ا سايتىندا قوعام تالقىسىندا بولادى.

ەسكە سالساق، الماتى اكىمدىگى بەيبىت ميتينگى، جينالىس پەن شەرۋ وتەتىن ءتورت ورىندى ناقتىلاپ بەرگەن بولاتىن.

ياعني، ماحاتما گاندي اتىنداعى ساياباقتا، «سارى ارقا» كينوتەاترىنىڭ ارتىنداعى الاڭدا، شوقان ءۋاليحانوۆ الاڭىندا، سونداي-اق شوقان ءۋاليحانوۆ الاڭىنان شيەۆچەنكو كوشەسىنىڭ بويىنداعى ماحاتما گاندي اتىنداعى ساياباققا دەيىن جول بويىندا وتكىزۋگە بولادى.