الماتىدا بانكروت اتانعان ازاماتتاردىڭ سانى 4 مىڭنان استى

الماتى. KAZINFORM - بيىل بانكروت اتانعان ازاماتتاردىڭ سانى 100 گە جەتپەيدى.

الماتى قالاسى مەملەكەتتىك كىرىستەر دەپارتامەنتىنىڭ مالىمەتىنشە، بۇگىنگە دەيىن مەگاپوليستە 4202 ازامات بانكروت دەپ تانىلعان.

وندا سوتتان تىس بانكروت دەپ تانىلعاندار سانى - 4054 ازامات، ال سوت شەشىمىمەن بانكروت دەپ تانىلعاندار - 148.

ونىڭ ىشىندە 2023-جىلى 1334 ازاماتقا، 2024-جىلى 2805 ازاماتقا، 2025-جىلى 63 ازاماتقا بانكروت مارتەبەسى بەرىلگەن. وسى ۋاقىتقا دەيىن بانكروت دەپ تانىلعان ازاماتتاردىڭ اراسىندا ەڭ كوپ قارىز 22993360660 تەڭگە بولسا، ەڭ از قارىز 250000 تەڭگە. ال تولەم قابىلەتتىلىگىن قالپىنا كەلتىرۋ ءراسىمىن بۇگىنگە دەيىن 13 ازامات قولدانعان.

- 2025-جىلدىڭ 1-قاڭتارىنان باستاپ 3023 بورىشكەرگە سوتتان تىس بانكروتتىق ءراسىمىن قابىلداۋ وتىنىشىنە باس تارتىلدى. 2023-جىلدان بەرى 12500 بورىشكەرگە سوتتان تىس بانكروتتىق ءراسىمىن قابىلداۋ وتىنىشىنەن باس تارتىلدى، - دەپ حابارلادى مەملەكەتتىك كىرىستەر دەپارتامەنتىنەن.

سوتتان تىس بانكروتتىق ءراسىمىن قابىلداۋ وتىنىشىنە باس تارتۋدىڭ نەگىزگى سەبەپتەرى:

1. ورتاق مەنشىكتەگى مۇلىكتى قوسا العاندا، جەكە مۇلىكتىڭ بولۋى؛

2. ارىز بەرىلگەن كۇنگە دەيىن 12 اي ىشىندە تولەم وتەۋىنىڭ بولۋى.

وسى ۋاقىتقا دەيىن بانكروتتىق ءراسىمدى مۇلىك جاسىرۋ نە وزگە سەبەپتەرگە بايلانىستى توقتاتۋ فاكتىلەرى بولماعان.

ەسكە سالايىق، 2023-جىلدىڭ 3-ناۋرىزىندا ەلىمىزدە جەكە تۇلعالاردىڭ بانكروتتىعىن راسىمدەۋگە ءوتىنىش قابىلداۋ باستالدى.

كەيىن جەكە تۇلعانىڭ بانكروتتىعى تۋرالى جاڭا «قولداۋ» اقپاراتتىق جۇيەسى ىسكە قوسىلدى.

بيىل سوتتان تىس بانكروتتىق ءراسىمىن قولدانۋ جەڭىلدەتىلدى.

اتاپ ايتقاندا، كەلەسى قۇجاتتاردى تاپسىرۋ تالاپ ەتىلمەيدى:

1) ناقتى قارىز سوماسىن راستايتىن قۇجاتتار؛

2) ءاربىر نەسيە بەرۋشىنىڭ اتاۋى تۋرالى مالىمەتتەر؛

3) قارىزدى رەتتەۋ ارەكەتتەرىن دالەلدەيتىن ءتۇرلى انىقتامالار مەن مالىمەتتەر.

بۇعان دەيىن بانكروتتىق راسىمىنىڭ قانداي سالدارى بار ەكەنىن جازعانبىز.