الماتىدا بالاعا دورەكى مىنەز كورسەتكەن بالاباقشا تاربيەشىسى جۇمىستان شەتتەتىلدى
الەۋمەتتىك جەلىدە الماتىداعى بالاباقشالاردىڭ بىرىندە تاربيەشىنىڭ بالاعا دورەكى مىنەز كورسەتكەن ۆيدەوسى شىقتى. قالالىق ءبىلىم باسقارماسى بۇل جايعا قاتىستى تۇسىنىك بەردى، دەپ حابارلايدى Kazinform.
بالاباقشادا بالاعا دورەكى مىنەز كورسەتكەن ۆيدەو Kozachkov offside Telegram ارناسىنا شىقتى. وندا وقيعانىڭ «چۋدو ساد» جەكە بالاباقشاسىندا بولعانى جازىلعان.
الماتى قالالىق ءبىلىم باسقارماسى اتالعان بالاباقشادا بالامەن دورەكى قارىم-قاتىناس جاساۋ فاكتىسى بويىنشا اتا-انالار 30-قاراشادا ناۋرىزباي اۋدانىنىڭ پوليتسيا باسقارماسىنا جۇگىنگەنىن اتاپ ءوتتى.
«قازىرگى ۋاقىتتا ناۋرىزباي اۋداندىق پوليتسيا باسقارماسىنىڭ سوتقا دەيىنگى تەرگەۋ ورگانى قىلمىستىق ءىس قوزعاپ، تەرگەۋ جۇرگىزۋدە. تاربيەشى مەن ونىڭ كومەكشىسى تەرگەۋ اياقتالعانعا دەيىن قىزمەتتەن شەتتەتىلدى»، - دەپ تۇسىنىك بەردى قالالىق ءبىلىم باسقارماسى.
اۆتور
دۋمان ارعىنگەلدى
