الماتىدا اۆتوبۋس جۇرگىزۋشىسىن ۇرعان ەر ادام قاماۋعا الىندى

الماتى. KAZINFORM - الماتىدا قوعامدىق كولىكتى تىزگىندەگەن جۇرگىزۋشىنى ۇرعان جولاۋشى قاماۋعا الىندى.

الماتى قالالىق پوليتسيا دەپارتامەنتىنىڭ مالىمەتىنشە، 11-ءساۋىر تاڭعى 08:00 شاماسىندا № 98-باعىتتاعى اۆتوبۋس جۇرگىزۋشىسى مەن جولاۋشى اراسىندا جانجال شىقتى.

«38 جاستاعى جولاۋشى قوعامدىق ءتارتىپتى بۇزىپ، كولىك جۇرگىزۋشىسىنە دەنە جاراقاتىن سالعان. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. بۇزاقىلىق دەرەگى بويىنشا قىلمىستىق ءىس قوزعالدى. ساراپتاما تاعايىندالدى. كۇدىكتى ءوزىن قورعاۋ ءۇشىن جۇمىسقا كەشىگىپ بارا جاتقاندىقتان جۇرگىزۋشىدەن تەزىرەك ءجۇرۋىن سۇراعانىن ايتتى»، - دەيدى بوستاندىق اۋداندىق پوليتسيا باسقارماسىنىڭ باستىعى ديدار احانوۆ.

ايتا كەتەيىك، بىلتىر دا الماتىدا №47-باعىتتاعى قوعامدىق كولىكتىڭ ىشىندە جولاۋشى جانجال شىعارىپ، جۇرگىزۋشى ايەلدى ۇرعان ەدى. سالدارىنان ايەل ەسىنەن تانىپ، كولىكتى باسقارا الماي، ايالدامادا تۇرعان ءبىر توپ ادامدى قاققان بولاتىن. اتالعان وقيعادان 7 ادام زارداپ شەگىپ، 3 ادام قايتىس بولعان.

اۆتور
الما مۇقانوۆا