الماتىدا اۆتوبۋس جۇرگىزۋشىسىن ۇرعان جولاۋشىعا قاتىستى قىلمىستىق ءىس قوزعالدى

الماتىدا قوعامدىق كولىكتىڭ ىشىندە جولاۋشى جانجال شىعارىپ، جۇرگىزۋشى ايەلدى ۇرعان. سالدارىنان ايەل ەسىنەن تانىپ، كولىكتى باسقارا الماي، ايالدامادا تۇرعان ادامداردى قاققان.

ال اۆتوبۋس جۇرگىزۋشىسىن ۇرعان ەر ادام ۇستالىپ، قاماۋعا الىندى، دەپ حابارلايدى Kazinform.

«اۆتوبۋس جۇرگىزۋشىسىن ۇرعان ەر ادامعا قاتىستى ق ر ق ك 293-بابى (بۇزاقىلىق) جانە ق ر ق ك 351-بابى (ەكى جانە ودان دا كوپ ادامنىڭ ولىمىنە اكەپ سوققان كولىكتىڭ قاۋىپسىز جۇمىسىن قامتاماسىز ەتەتىن ەرەجەلەردى بۇزۋ) بويىنشا قىلمىستىق ءىس تىركەلدى. ول پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى»، - دەپ حابارلادى قالالىق پوليتسيا دەپارتامەنتىنىڭ باسپا ءسوز قىزمەتى.

ايتا كەتەيىك، الماتىدا ايالدامادا بولعان اپاتتىڭ سالدارىنان 7 ادام زارداپ شەكتى. جەدەل مەديتسينالىق قىزمەت كەلگەنشە ۇشەۋى قايتىس بولدى.

ءۇش ەرەسەك ادامعا جابىق باسسۇيەك-مي جاراقاتى، مي شايقالۋى، بىرەۋىنە سول جاق جامباس سۇيەگىنىڭ سىنىعى دياگنوزى قويىلىپ، 7- قالالىق كلينيكالىق اۋرۋحاناعا جاتقىزىلدى. ءتورتىنشى زارداپ شەككەن 15 جاستاعى بالا سول تابان سۇيەكتەرىنىڭ سىنۋى دياگنوزىمەن 2- قالالىق بالالار كلينيكالىق اۋرۋحاناسىنا جاتقىزىلدى. اۆتوبۋستى جۇرگىزگەن ايەلگە جابىق باسسۇيەك-مي جاراقاتى، مي شايقالۋى دياگنوزى قويىلدى. زارداپ شەككەندەرگە پسيحولوگيالىق جانە وزگە دە قاجەتتى مەديتسينالىق كومەك تولىق كولەمدە كورسەتىلىپ جاتىر.