الماتىدا اۆتوبۋس جۇرگىزۋشىسىنە شابۋىل جاساعان كۇدىكتى ۇستالدى
الماتى. KAZINFORM - الماتىدا قوعامدىق كولىك جۇرگىزۋشىسىنە جولاۋشى شابۋىل جاساعان. جانجال ناتيجەسىندە سالون ىشىندەگى جۇرگىزشى ەسىگىنىڭ اينەگى سىنعان. جەلىدەگى مالىمەتكە سايكەس، وقيعا 120-اۆتوبۋستا بولعان.
الماتى قالاسىنىڭ پوليتسيا دەپارتامەنتى جۇرگىزۋشىگە شابۋىل جاساعان كۇدىكتى ۇستالعانىن حابارلادى.
- بۇل دەرەك بويىنشا اۋەزوۆ اۋداندىق پوليتسيا باسقارماسى تەرگەۋ امالدارىن جۇرگىزىپ جاتىر. قۇقىق بۇزۋشىنىڭ جەكە باسى انىقتالىپ، قاماۋعا الىندى. كۇدىكتىنىڭ ارەكەتىنە قۇقىقتىق باعا بەرىلەتىن بولادى، - دەپ حابارلادى قالالىق پ د باسپا ءسوز قىزمەتىنەن.
ەسكە سالايىق، بىلتىر الماتىدا 47-باعىتتاعى قوعامدىق كولىكتىڭ ىشىندە جولاۋشى جانجال شىعارىپ، جۇرگىزۋشى ايەلدى ۇرعان ەدى. سالدارىنان ايەل ەسىنەن تانىپ، كولىكتى باسقارا الماي، ايالدامادا تۇرعان ءبىر توپ ادامدى قاققان بولاتىن. اتالعان وقيعادان 7 ادام زارداپ شەگىپ، 3 ادام قايتىس بولعان.
بيىل ءساۋىر ايىندا 3 ادامنىڭ ءومىرىن قيعان اۆتوبۋس اپاتىنا قاتىستى سوت ۇكىمى شىقتى. سوت دارحان احمەتجانوۆتى 8 جىلعا باس بوستاندىعىنان ايىردى.
