الماتىدا «الدار كوسە» بالەتىنىڭ پرەمەراسى ءوتتى
اباي اتىنداعى قازاق ۇلتتىق وپەرا جانە بالەت تەاترىندا العاش رەت «الدار كوسە» ەرتەگىسىنىڭ جەلىسىمەن بالەت ساحنالاندى، دەپ حابارلايدى Kazinform.
تەاتردىڭ مالىمەتىنشە، وسىدان 30 جىل بۇرىن قازاقتىڭ كورنەكتى بالەتمەيستەرى مەنتاي تلەۋبايەۆ پەن كومپوزيتور المابەك مەيىربەكوۆ «الدار كوسە» بالەتىن تەاتردا ساحنالاماق بولعان. الايدا، بالەتتىڭ مۋزىكاسى اياقتالماي قالعان. اراعا 30 جىل سالىپ اتالمىش بالەتتى مەنتاي تلەۋبايەۆتىڭ ۇلى ءارى ءىزباسارى، جاپونيا بالەت تەاترىنىڭ جەتەكشى بالەت سوليسى، بالەتمەيستەر مايلەن تلەۋبايەۆ كورەرمەن نازارىنا ۇسىندى.
«بالەتتە الدار كوسە مەن باسقا دا كەيىپكەرلەردىڭ بەينەسىن اشۋدا كەرەمەت اكتەر ءارى رەجيسسەر شاكەن ايمانوۆتىڭ «الدار كوسە» فيلمىنىڭ پايداسى كوپ بولدى. سەبەبى، شاكەن ايمانوۆ بۇل فيلمدە بارلىق كەيىپكەرلەردى جاقسى كورسەتە بىلگەن. سونداي-اق بالەتتى ساحنالاۋعا كونستانتين التايدىڭ «الدار كوسە» كىتابىنىڭ كومەگى كوپ بولدى. بۇل كىتاپتا قازاق حالىق ەرتەگىلەرىنىڭ نەگىزىندە الدار كوسە تۋرالى باياندالعان. تاپقىر الدار كوسە ءارقاشان مەيىرىمدى، ادال ادامدارعا كومەكتەسۋگە دايىن، ال اشكوز، ايلاكەر، جالقاۋ ادامداردى جانى سۇيمەيدى. ادام بويىنداعى بۇل ەرەكشە قاسيەتتەر «الدار كوسە» بالالار بالەتىندە كورسەتىلەدى، - دەدى مايلەن تلەۋبايەۆ.
تەاتردىڭ باسپا ءسوز قىزمەتىنىڭ اتاپ وتۋىنشە، جاڭا پرەمەرا مۋزىكاسى ەستىلگەن ساتتەن كورەرمەن كوڭىلىن باۋراپ، حورەوگرافياسى مەن ارتىستەردىڭ اكتەرلىك شەبەرلىگى ناعىز عاجايىپ الەمگە جەتەلەيدى.
