الماتىدا اعاشتاردى زاڭسىز كەسۋ فاكتىسى بويىنشا قىلمىستىق ءىس قوزعالدى
الماتىنىڭ الاتاۋ اۋدانىندا 176 اعاش پەن 40 تان استام جابايى وسكەن بۇتالار - بارلىعى 216 جاسىل جەلەك زاڭسىز كەسىلگەن، دەپ حابارلايدى Kazinform.
الماتى قالاسىنىڭ ەكولوگيا جانە قورشاعان ورتا باسقارماسىنىڭ مالىمەتىنشە، «Qazaq Stroy Almaty» ج ش س قۇرىلىس وبەكتىسىندە اعاشتار زاڭسىز وتالعان.
«جالپى الاڭى 17 گەكتار جەر ۋچاسكەسىندە كەسۋگە جانە قۇرىلىس جۇرگىزۋگە رۇقسات بەرىلمەسە دە مۇنداعى 176 ءتۇپ اعاش پەن 40 تان استام جابايى وسكەن بۇتالار (بارلىعى 216 جاسىل جەلەك كەسىلگەن»، - دەپ حابارلادى قالالىق اكىمدىكتەن.
وسىعان بايلانىستى باسقارما مامانداندىرىلعان تابيعات قورعاۋ پروكۋراتۋراسى جانە تابيعات قورعاۋ پوليتسياسىنىڭ قىزمەتكەرلەرىمەن بىرلەسىپ كەلتىرىلگەن زالالدى ەسەپتەيدى ءارى جاسىل جەلەكتەردى تەكسەرۋ اكتىسىن جاسايدى. انىقتالعان فاكتى بويىنشا الماتى قالاسى الاتاۋ اۋدانىنىڭ پوليتسيا باسقارماسى قر قىلمىستىق كودەكسىنىڭ 340-بابى بويىنشا قىلمىستىق ءىس قوزعادى.
قالالىق اكىمدىكتەن اتاپ وتكەندەي، 2023 -جىلدىڭ ماۋسىم ايىنان باستاپ «مەملەكەتتىك قىزمەتتەر» پورتالى ارقىلى (Elicense.kz) الماتىنىڭ ەكولوگيا جانە قورشاعان ورتا باسقارماسىنا «Qazaq Stroy Almaty» ج ش س- نەن تۇرعىن ءۇي كەشەنى قۇرىلىسى اۋماعىنداعى اعاشتاردى كەسۋگە رۇقسات الۋ ءۇشىن 6 ءوتىنىم كەلىپ تۇسكەن. الايدا، ساراپتاما قورىتىندىسىنىڭ بولماۋىنا بايلانىستى اعاشتاردى كەسۋگە رۇقسات بەرىلمەدى.
28-قاراشادا «Altyn Ai ت ك» ج ش س جاڭا مەنشىك يەسى جۇمىس جوباسى «مەم ساراپتاما» ر م ك حاتىمەن تولىقتىرىلدى. كەيىن 5-جەلتوقساندا مەملەكەتتىك قىزمەتتەر پورتالى ارقىلى «Qazaq Stroy Almaty» ج ش س- نەن قىزمەت كورسەتۋ وبەكتىلەرى مەن جەراستى پاركينگى بار مج ك قۇرىلىسىنا جاسىل جەلەكتەردى كەسۋگە قاتىستى رۇقسات الۋعا قۇجاتتار قايتادان تاپسىرىلدى.
«ايتا كەتۋ كەرەك، اعاشتاردى كەسۋگە رۇقسات بەرۋ مەملەكەتتىك قىزمەت سانالادى، سوندىقتان قاجەتتى قۇجاتتار پاكەتى ۇسىنىلعان جاعدايدا رۇقسات بەرۋدەن باس تارتۋ مۇمكىن ەمەس. بەكىتىلگەن جانە كەلىسىلگەن قالا قۇرىلىسى قۇجاتتاماسىندا (مەملەكەتتىك ۆەدومستۆودان تىس ساراپتاما) كوزدەلگەن قۇرىلىس قىزمەتىن، قۇرىلىس- مونتاج جۇمىستارىن جۇزەگە اسىرۋ ءۇشىن جاعدايلاردى قامتاماسىز ەتۋ جونىندەگى قۇجاتتاردىڭ تولىق پاكەتىنىڭ ۇسىنىلۋىنا بايلانىستى 2023 -جىلعى 11 -جەلتوقساندا باسقارما جوعارىدا كورسەتىلگەن مەكەنجاي بويىنشا كەسۋگە رۇقسات بەرىلگەن 2797 دانا اعاشتىڭ ورنىنا 27970 دانا كولەمىندە وتەمدىك جاسىل جەلەك وتىرعىزاتىن بولادى. باسقارما سونىمەن قاتار 100 دانا جاسىل جەلەكتەردى باسقا جەرگە وتىرعىزۋ جونىندەگى جۇمىستارعا كەلىسىم بەردى»، - دەپ حابارلادى اكىمدىكتەن.
كوشەتتەردى وتىرعىزۋ «الماتى قالاسىنىڭ جاسىل جەلەكتەرىن كۇتىپ-ۇستاۋ جانە قورعاۋ قاعيدالارىنىڭ» بارلىق تالابىن ساقتاي وتىرىپ، بيىكتىگى كەمىندە 2,5 مەتر بولاتىن جالپى پايدالانىمداعى جەرلەردە جۇرگىزىلەدى.
