الماتىدا 6 مىڭ قىز پاپيللوما ۆيرۋسىنا قارسى ۆاكسينا الدى
الماتى. KAZINFORM - الماتى قالاسىنىڭ مەكتەپتەرىندە 2024 -جىلدىڭ 30 - قىركۇيەگىنەن باستاپ 11 جاستاعى قىزدارعا ادام پاپيللوما ۆيرۋسىنا قارسى جوسپارلى ۆاكسيناتسيالاۋ، سونداي- اق 12، 13 جاستاعى قىزدارعا ۆاكسيناتسيا ءجۇرىپ جاتىر.

قالالىق سانيتاريالىق- ەپيدەميولوگيالىق باقىلاۋ دەپارتامەنتىنىڭ مالىمەتىنشە، مەگاپوليستە ا پ ۆ- عا قارسى ءبىرىنشى دوزامەن بارلىعى 6067 قىز ۆاكسيناتسيالاندى، ونىڭ ىشىندە 11 جاستاعى قىزدار - 2392، ال 12-13 جاستاعى قىزدار - 3675. ۆاكتسيناتسيالانعان قىزدار اراسىندا ۆاكتسيناتسيادان كەيىنگى قولايسىز جاعدايلار تىركەلمەگەن.
- ۆاكسيناتسيالاۋعا رۇقساتى بار مەديتسينا قىزمەتكەرلەرى ەگىلەتىن ادامداردى قاراپ، تەكسەرۋدەن وتكىزىپ، ۆاكسيناتسيالاۋدى جۇرگىزۋگە اتا- اناسىنان (زاڭدى وكىلدەرىنەن) كەلىسىم العاننان كەيىن جۇرگىزەدى. ا پ ۆ- عا قارسى ۆاكتسيناتسيا دۇنيەجۇزىلىك دەنساۋلىق ساقتاۋ ۇيىمىندا سەرتيفيكاتتالعان، 6 اي ارالىعىمەن 2 دوزادان تۇراتىن، قازاقستان رەسپۋبليكاسىندا تىركەلگەن ا ق ش- تىڭ 4 ۆالەنتتى «گارداسيل» ۆاكسيناسىن قولدانادى. بۇل ۆاكسينا ا پ ۆ 6،11،16 جانە 18 تۇرلەرىنەن قورعايدى، - دەدى سانيتاريالىق- ەپيدەميولوگيالىق باقىلاۋ دەپارتامەنتىنىڭ باسشىسى قاسىمحان الپىسباي ۇلى.
سونداي-اق ول ۆاكسينا الۋدىڭ ماڭىزدىلىعىنا توقتالدى.
الماتى قالاسىنىڭ باس سانيتاريالىق دارىگەرىنىڭ ايتۋىنشا، ەلىمىزدە جىل سايىن 1900 گە جۋىق ايەلدە جاتىر موينى وبىرى انىقتالادى جانە ستاتيستيكاعا سايكەس، كۇن سايىن 2 ايەل جاتىر موينى وبىرىنان قايتىس بولادى.
ەسكە سالايىق، بۇعان دەيىن الماتىدا تۇماۋ مەن ج ر ۆ ي جۇقتىرعاندار سانى ارتقانىن جازعانبىز.