الماتىدا 6 جاسار قىزدىڭ جۇمباق ءولىمى: سوت ايىپتالۋشىلاردىڭ ءبارىن اقتادى
الماتى. KAZINFORM - الماتىدا 6 جاستاعى ەليزاۆەتا پىلايەۆانىڭ جۇمباق ولىمىنە قاتىستى اتىشۋلى ىسكە نۇكتە قويىلدى.
ناۋرىزباي اۋداندىق قىلمىستىق ىستەر جونىندەگى مامانداندىرىلعان اۋدانارالىق سوتى 6 جاسار قىزدىڭ ولىمىنە قاتىستى ءىستى قارادى.
سۋديانىڭ ايتۋىنشا، ەليزاۆەتا پىلايەۆانىڭ ولىمىنە قاتىسى بار دەپ ايىپتالعان ناعاشى تاتەسى ولگا شماكوۆا، ناعاشى اجەسى لەوناردا رىجاكوۆا جانە باعبان ۋكتاب ماحمۋدوۆتىڭ قىلمىسى دالەلدەنگەن جوق.
ەسكە سالا كەتەيىك، ەليزاۆەتا پىلايەۆا 2019-جىلدىڭ 12-مامىرى كۇنى بەلگىسىز جاعدايدا قايتىس بولدى.
قىزدىڭ اكەسى الەكساندر پىلايەۆتىڭ ايتۋىنشا، قىزدى 9-مامىردا اناسى الىپ كەتكەن. 12-مامىردا وعان بۇرىنعى جۇبايى حابارلاسىپ، بالانىڭ اۋرۋحانادا اۋىر حالدە جاتقانىن حابارلاعان.
«قىزىم مەنىمەن تۇراتىن. 9-مامىردا ونى اناسى، مەنىڭ بۇرىنعى ايەلىم الىپ كەتتى.12-مامىردا ول ماعان كەشكە قوڭىراۋ شالىپ، قىزىمنىڭ اۋرۋحانانىڭ جانساقتاۋ بولىمىنە تۇسكەنىن ايتتى. ول «ليزا ەسكەرتكىش مۇسىننەن قۇلاپ قالدى» دەدى. دەرەۋ اۋرۋحاناعا كەلدىم. دارىگەرلەردىڭ ايتۋىنشا، قىزىم اۋرۋحاناعا كەلگەندە ءولى تۇسكەن. بالامنىڭ ومىرتقاسى سىنىپ كەتكەن. دەنەسى جاراقات العان. ءبىراق ۇستىندە ءبىر تامشى قان جوق. تاڭ قالارلىق بولىپ كورىندى»، - دەگەن بولاتىن اكەسى الەكساندر پىلايەۆ.
بۇعان دەيىن پروكۋروردىڭ ايىپتاۋ اكتىسى بويىنشا، مارقۇمنىڭ اتا-اناسى اراسىنداعى اجىراسۋ پروتسەسى 2014-جىلى باستالعان، سودان كەيىن ليزانىڭ اناسى الەكساندر پىلايەۆ قىزدىڭ بيولوگيالىق اكەسى ەمەس ەكەنىن ايتقان. كەيىننەن بۇرىنعى ەرلى-زايىپتى بىتىمگەرلىك كەلىسىمگە كەلگەن. ناتيجەسىندە ليزا اكەسىمەن بىرگە تۇرعان. ال اناسى ونى دەمالىس جانە مەرەكە كۇندەرى الىپ كەتىپ جۇرگەن. 2019-جىلدىڭ مامىر ايىندا دا وسىلاي بولعان.
سول ۋاقىتتا ليزانى اناسى الىپ كەتكەن، ءبىراق ءوزى دەمالۋعا الماتى وبلىسىنا كەتىپ قالعان. سول كەزدە قىزدى ناعاشى اپكەسى ولگا شماكوۆا مەن ونىڭ كۇيەۋى قاراپ قالعان. شماكوۆانىڭ كۇيەۋى كىشكەنتاي ليزامەن ۋاقىت وتكىزگەن. مۇنى بايقاعان كۇدىكتى ولگا شماكوۆا اشۋلانىپ، قىزعانعان. ول كۇيەۋى قىزدىڭ اكەسى بولۋى مۇمكىن دەپ كۇدىكتەنگەن. سوسىن كۇدىكتى بالالارىن الىپ، ساۋدا ورتالىعىنا كولىكپەن بارماق بولعان.
«وسى كەزدە كىشكەنتاي ليزا پىلايەۆا ۇيدەن اۋلاعا شىعىپ تۇرعان. ولگا شماكوۆا ءوزىنىڭ وتباسىنداعى جاعدايعا اشۋلانىپ، كىشكەنتاي قىزعا قاستاندىق ويلاعان. قىلمىستى جاساۋ ءۇشىن كولىكتى قارۋ رەتىندە پايدالانىپ، كامەلەتكە تولماعان ەليزاۆەتا پىلايەۆانى قاعىپ كەتكەن»، - دەلىنگەن بولاتىن ايىپتاۋ اكتىسىندە.
