الماتىدا 500 دەن استام درون شوۋ ۇيىمداستىرىلدى
الماتى. KAZINFORM - الماتىدا رەسپۋبليكا كۇنىن مەرەكەلەۋ اياسىندا اباي الاڭىندا دروندار شوۋى ءوتتى.
رەسپۋبليكا كۇنىنە ارنالعان مەرەكەلىك ءىس-شارا قالا تۇرعىندارى مەن قوناقتارى ءۇشىن تاڭعاجايىپ كورىنىس ۇسىندى. شوۋ شامامەن 20 مينۋتقا سوزىلدى، ونى 15 مىڭعا جۋىق الماتىلىق تاماشالادى.
اسپانعا ءبىر مەزەتتە 500 دەن استام درون ۇشىپ، ۇلتتىق مادەنيەت ەلەمەنتتەرى مەن ەل تاريحىنداعى ماڭىزدى ساتتەردى بەينەلەيتىن ەرەكشە باعدارلامانى ۇسىندى. اتاپ ايتقاندا، قازاقستاننىڭ گەوگرافيالىق كارتاسىنان باستاپ، مەملەكەتتىك تۋ، كيىز ءۇي، التىن ادام، الما، قىزعالداق جانە وزگە دە بەينەلەر كورسەتىلدى.
ەسكە سالايىق، بۇعان دەيىن الماتىدا رەسپۋبليكا كۇنىنە وراي مەملەكەتتىك تۋ كوتەرىلگەنىن جازعانبىز. مەملەكەتتىك تۋدىڭ كولەمى 98 شارشى مەتر، بيىكتىگى 40 مەتر بولدى.
سونداي-اق رەسپۋبليكا كۇنىنە وراي «كوكتوبە» تەلەمۇناراسىندا مەرەكەلىك ساۋلەتتىك جارىقتاندىرۋ قوسىلدى.
اۆتور
دوسبول اتاجان
