الماتىدا 2024-جىلى كوپدەڭگەيلى اۆتوتۇراقتار پايدا بولۋى مۇمكىن
الماتى اكىمى ەربولات دوسايەۆ كوپدەڭگەيلى پاركينگتەردى دامىتۋ جوسپارلارى تۋرالى ايتتى، دەپ حابارلايدى قازاقپارات ءتىلشىسى.
مەدەۋ اۋدانى تۇرعىندارىنىڭ ءبىرى مەگاپوليس اكىمىمەن كەزدەسۋدە سنەگين كوشەسىندە 15 جىلدان استام ۋاقىت بويى كوپدەڭگەيلى پاركينگ قاراۋسىز تۇرعانىن جەتكىزدى. ايتۋىنشا، ونى ءارتۇرلى اسوتسيالدى ەلەمەنتتەر، قاڭعىباس يتتەر پانالاۋدا. بۇل تۇرعىندارعا ۇلكەن قولايسىزدىق تۋدىرادى.
«ءبىز بۇل ماسەلەنى شەشۋ جولدارىن قاراستىرۋدامىز. ەستەرىڭىزدە بولسا، مەن قالادا كوپدەڭگەيلى پاركينگتەردى دامىتۋ بويىنشا تاپسىرما بەرگەن بولاتىنمىن. ماسەلە وبەكتىنى ساتىپ الۋ مەن ونىڭ باعاسىنا قاتىستى. بيىل بىزدە قارجىلىق مۇمكىندىكتەر بولمايدى، ءبىراق 2024-جىلعا ارنالعان بيۋجەتتى قالىپتاستىرۋ كەزىندە مەن تۇرعىندارعا ىڭعايلى بولۋ ءۇشىن ولاردى كوپدەڭگەيلى پاركينگتەرگە اينالدىرۋ ءۇشىن ساتىپ الۋعا نەمەسە قۇرىلىستى اياقتاۋعا بولاتىن بارلىق ورىندى قاراۋعا قاتىستى تاپسىرما بەردىم. سامال بويىنشا تاپسىرما بەرەمىن: بۇل جوبا قانشاعا باعالاناتىنىن كورەيىك. سول جەردە ىڭعايلى ءارى دۇرىس پاركينگ جاساۋ قاراستىرىلادى. ءسىز دۇرىس بايقاعانسىز، ەسكى كوپدەڭگەيلى پاركينگ بۇرىننان تۇر. ءبىز ونى جاساي الامىز با الدە بۇزۋ كەرەك پە؟ قاراستىرامىز»، - دەدى ەربولات دوسايەۆ.
بۇعان دەيىن قالا باسشىسى كوپدەڭگەيلى اۆتوتۇراق سالۋ باعدارلاماسى قولعا الىنعانى تۋرالى ايتقان بولاتىن.
