الماتىدا 13 تۋىسقاننان قۇرالعان ءىرى الاياقتىق توبى اشكەرەلەندى
استانا. قازاقپارات - الماتىدا اسا ءىرى كولەمدەگى الاياقتىق فاكتىسى بويىنشا تەرگەۋ اياقتالدى، - دەپ حابارلايدى Massaget.kz ءتىلشىسى.
باس پروكۋراتۋرانىڭ مالىمەتىنشە، كۇدىكتى ايەل مەن ونىڭ 12 تۋىسقان سەرىكتەسىنە قاتىستى تەرگەۋدى الماتى قالالىق پوليتسيا دەپارتامەنتى پروكۋراتۋرانىڭ ۇيلەستىرۋىمەن جۇرگىزگەن.
تەرگەۋ بارىسىندا انىقتالعانداي، نەگىزگى ايىپتالۋشى مەسسەندجەرلەردە چاتتار اشىپ، قىتاي، وزبەكستان جانە رەسەي زاۋىتتارىمەن تىكەلەي بايلانىسى بارىن ايتىپ، تۇرمىستىق تاۋارلاردى - ىدىس-اياق، جيھاز جانە وزگە دە بۇيىمداردى نارىقتاعى باعادان الدەقايدا ارزانعا ساتاتىنىن جارنامالاعان.
الايدا شىن مانىندە، ول تاۋارلاردى الماتى بازارلارىنان ءوز ەسەبىنەن ساتىپ الىپ وتىرعان. جارناماعا سەنىپ قالعان ازاماتتار وعان وندىرۋشىلەردەن كوتەرمە باعادا تاۋارعا تاپسىرىس بەرۋ ءۇشىن اقشا جىبەرىپ وتىرعان. تاۋاردىڭ جەتكىزىلۋ مەرزىمى رەتىندە 6-12 اي ارالىعى كورسەتىلگەن.
«تۇسكەن قارجىنى كۇدىكتىلەر قىمبات اۆتوكولىكتەر، پاتەرلەر، ۇيلەر، جەر تەلىمدەرى، كيىمدەر، ساياحاتتار جانە بۋكمەكەرلىك كەڭسەلەرگە باسە تىگۋگە جۇمساعان. تەرگەۋ بارىسىندا 34 اۆتوكولىك، 2 پاتەر، 1 پەنتحاۋس، 2 جەكە تۇرعىن ءۇي مەن جەر ۋچاسكەلەرى تاركىلەندى»، - دەپ حابارلادى باس پروكۋراتۋرانىڭ باسپا ءسوز قىزمەتى.
الاياقتىقتىڭ قۇرباندارى رەتىندە الماتىدان سارانعا دەيىنگى ايماقتاردان 290 ادام تانىلدى. جالپى شىعىن كولەمى - 4,6 ميلليارد تەڭگە.
قىلمىستىق ءىس پروكۋراتۋرامەن سوتقا جولداندى.
نەگىزگى ايىپتالۋشى مەن ونىڭ قىلمىستىق سحەماعا قاتىسقان تۋىستارى ق ر ق ك 190-بابى 4- ءبولىمى 2-تارماعى - «اسا ءىرى كولەمدەگى الاياقتىق» بويىنشا 10 جىلعا دەيىن باس بوستاندىعىنان ايىرىلۋى مۇمكىن.
ەسكە سالساق، بۇعان دەيىن جەتىسۋ وبلىسىندا كولىك الاياقتىعىنىڭ ءىرى سحەماسى اشكەرەلەنگەن. 33 جانە 34 جاستاعى ەكى ازامات تاسىمالداۋ قىزمەتىن ۇسىنىپ، 13 اۆتوكولىكتى يەلەرىنەن الداپ العان. كەلتىرىلگەن جالپى شىعىن - 314 ميلليون تەڭگەدەن استام.
