الماتىدا 12 قاباتتان جوعارى قۇرىلىسقا تىيىم سالىنۋى مۇمكىن

الماتى. KAZINFORM - الماتى قالاسى ءماسليحاتىنىڭ كەزەكتەن تىس ХХVI سەسسياسى ءوتىپ جاتىر. كۇن تارتىبىندەگى نەگىزگى ماسەلە قالا اۋماعىن سالۋ ەرەجەلەرىن بەكىتۋ.

الماتى قالاسى اكىمىنىڭ ورىنباسارى اسقار ءامرين مەگاپوليستىڭ سەيسميكالىق قاۋىپتى ورنالاسۋىن ەسكەرە وتىرىپ، قاتاڭ شەكتەۋلەر مەن قۇرىلىس تالاپتارىن ەنگىزۋ كەرەك ەكەنىن ايتتى.

- نەگىزگى جاڭاشىلدىق - نۇكتەلىك قۇرىلىسقا، اۋلا مەن رەكرەاتسيالىق اۋماقتاردا جانە 12 قاباتتان جوعارى قۇرىلىسقا تىيىم سالۋ. قۇرىلىس سالۋشىنىڭ كوپ قاباتتى تۇرعىن ءۇيدى پايدالانۋعا بەرۋ كەزىندە جەرگىلىكتى اتقارۋشى ورگان ارقىلى مۇلىك يەلەرىنىڭ بىرلەستىگىنە بارلىق قۇجاتتامانى بەرۋ رەگلامەنتى بەكىتىلگەن. بۇل ماسەلە قالانىڭ بارلىق قۇرىلىس سالۋشىلارىنا ورتاق، - دەدى ول.

وسىلايشا، ازىرلەگەن ەرەجەلەر پايدالانۋعا بەرۋگە دەيىن قۇرىلىستىڭ بارلىق ءتارتىبىن رەتتەيتىن بولادى.

كۇن تارتىبىندەگى ەكىنشى ماسەلە - قۇرىلىس نىساندارىن تەكسەرۋ ءتارتىبىن بەكىتۋ.

مەگاپوليس ورنالاسقان سەيسميكالىق ايماقتى ەسكەرە وتىرىپ، ەرەجەلەر تەك الماتى قالاسىنىڭ اۋماعىندا قولدانىلادى جانە قۇرىلىس وبەكتىلەرىنىڭ سەيسميكالىق قاۋىپسىزدىگىن قامتاماسىز ەتۋگە باعىتتالادى.

ينسپەكتسيا بارىسىندا قۇرىلىستىڭ ىرگەتاسى مەن نەگىزگى كونسترۋكتسيالارى سەيسميكالىق قاۋىپسىزدىككە تەكسەرىلەتىن بولادى.

- كەلەسى ماسەلە - جاڭا قالا قۇرىلىسى رەگلامەنتىن بەكىتۋ. رەگلامەنت 2040 -جىلعا دەيىن الماتى قالاسىنىڭ بۇرىن بەكىتىلگەن باس جوسپارىنا سايكەس ەنگىزىلەدى. قولدانىستاعى ەرەجە 2006 -جىلى بەكىتىلگەن بولاتىن. جاڭا رەگلامەنت 5 پوليتسەنتر ورتالىعىنىڭ ءبىر دەڭگەيدە دامۋىنا باعىتتالعان. رەگلامەنت شەڭبەرىندە سۋ قورعاۋ، ەرەكشە قورعالاتىن، اەراتسيا جانە ءتيىستى نورماتيۆتىك تالاپتار بەلگىلەنگەن جەرلەرگە، فۋنكتسيونالدىق ايماقتاردىڭ ناقتى كارتالارى ازىرلەندى. اتالعان كارتالار قالا اۋماعىندا جانە جەكەلەگەن اۋدانداردا قالا قۇرىلىسىنا شەكتەۋلەر بەلگىلەيدى، - قالا اكىمىنىڭ ورىنباسارى.

وسىعان دەيىن، الماتىدا قۇرىلىس نىساندارىنا بارۋ ءتارتىبى وزگەرەتىنى تۋرالى جازعان ەدىك.