الماتى زووباعىندا ەكى قونجىق ومىرگە كەلدى
الماتى. KAZINFORM - الماتى حايۋاناتتار باعىندا تيان-شاننىڭ اق تىرناقتى ايۋلارى گەردا مەن قۇرمانبەكتىڭ جۇبىندا ەكى قونجىق ومىرگە كەلدى. زووباقتىڭ مالىمەتىنشە، ولار وتكەن جىلى 19- جەلتوقسانىندا جارىق دۇنيە ەسىگىن اشقان.
«قازىر قونجىقتاردىڭ جاعدايى جامان ەمەس. ولاردىڭ ەنەسى گەردانىڭ دا دەنساۋلىعى جاقسى. ول وسىمەن ءۇشىنشى رەت ومىرگە ۇرپاق اكەلىپ وتىر. گەردا بۇعان دەيىن 2017 جانە 2021-جىلى تولدەپ، بارشامىزدى قۋانتقان ەدى. ول كەزدە ءبىزدىڭ پاراقشامىز ارقىلى سىزدەر ولارعا ەسىم بەرگەنسىزدەر»، - دەپ جازدى زووباق ۇجىمى جەلىدە.
وسى ورايدا Kazinform ءتىلشىسى الماتىداعى زووباق قىزمەتكەرلەرىنەن وسىنشاما ۋاقىت قونجىقتاردىڭ جىنىسىن انىقتاي الماۋدىڭ سەبەبىن سۇرادى. ولار ومىرگە كەلگەنىنە 4 ايعا جۋىق وتسە دە قونجىقتاردىڭ جىنىسىن انىقتاۋ ءالى مۇمكىن بولماي تۇرعانىن، سەبەبى، ەنەسى تولدەرىن قاتتى قىزعاناتىنىن، ماڭىنا ەش ادامدى جولاتپايتىنىن ايتتى.
«قونجىقتار جارتى جىلعا دەيىن ەنەسىنىڭ ءسۇتىن ەمەدى. قازىر گەردا ماڭىنا ەشكىمدى جولاتپايدى، قونجىقتارىن قاتتى قىزعانادى، ولاردى كۇنى بويى باۋىرىنا قىسىپ جاتادى. ءبىز ولاردى ادامدار جۇرمەيتىن جەكە اپان-ۇيشىككە ورنالاستىردىق. سەبەبى، ەنەسى ادامداردان قىزعانىپ، تولدەرىن تالاپ تاستاۋى مۇمكىن. قازىر ءبىر قىزمەتشىمىز عانا ولارعا كۇندەلىكتى تاماقتارىن اپارىپ بەرىپ ءجۇر. باسقا ەشبىر ادام ولاردىڭ ماڭىنا بارا المايدى. ەنەسى جولاتپايدى. شامامەن ەكى-ءۇش ايدان سوڭ، ۆاكسينا ەگەتىن كەزدە قونجىقتاردى جەكە الىپ، ولاردىڭ جىنىستارىن انىقتايتىن بولامىز. قونجىقتاردىڭ جىنىسى انىقتالعان سوڭ، ولارعا ات قويۋعا قاتىستى Instagram پاراقشامىزدا بايقاۋ جاريالايمىز»، - دەيدى زووباق وكىلدەرى.
قازىر گەرداعا لايىقتى مولشەردە تاماق بەرىلەدى. اتاپ ايتار بولساق، ونىڭ قۇرامىندا جەمىس-جيدەك، ەت، بالىق، بوتقا، نان، جارما، ءتۇرلى ۆيتاميندەر بار. كۇن جىلىنىپ، قونجىقتار ءوسىپ-جەتىلە باستاعاندا گەردا ولاردى دالاداعى قورشاۋعا شىعاراتىن بولادى.
ەسكە سالساق، بۇعان دەيىن زووباقتىڭ Instagram پاراقشاسىنداعى وقىرماندار ومىرگە كەلگەن قونجىقتارعا ەسىم بەرگەن بولاتىن. اتاپ ايتقاندا، 2017-جىلعى تولدەرگە نيك، نەلسون، 2019-جىلى ومىرگە كەلگەن تولگە كودا ەسىمىن بەردى.
