الماتى زووباعى جاڭا جانۋارلارمەن تولىقتى
الماتى زووباعىندا جاڭا جانۋارلار پايدا بولدى-بۇل كىرەكەي اق ايۋ، زەبرا، امۋر جولبارىسى، ۇرعاشى شيمپانزە جانە قىزعىلت فلامينگو. بۇل تۋرالى قالالىق مادەنيەت باسقارماسى مالىمدەدى، دەپ حابارلايدى Kazinform.
«2023-جىلى حايۋاناتتار باعىنداعى 25 ءتۇرلى جانۋاردان 80 ءتول الىندى. ولاردىڭ اراسىندا كوك قوي، شەتلاند پونيدىڭ قۇلىنى، كەنگۋرۋ، كىرپى، لەمۋر، تەڭبىل بۇعى، ءۇي قوداسى، چاپمان زەبراسى، سۋ سيىر، قوزىقۇماي، قۇماي، جاپون تىرناسى، تاۋ قازى، افريكالىق ۋلى سۇر جىلان، شىعىس كولوبۋسى جانە تاعى باسقالارى بار»،-دەدى الماتى قالالىق مادەنيەت باسقارماسىنىڭ باسشىسى عاني مايلىبايەۆ.
ايتۋىنشا، پۋرگا اتتى اق كىرەكەي كوپتىڭ نازارىن وزىنە اۋداردى. قازىر ول 6 جاستا، ەكى باسسەينى بار جارتى گەكتارعا جۋىق كەڭ قورشاۋدا تۇرادى.
«ءبىز بۇل وقيعانى ۇزاق كۇتتىك. اق قونجىقتى ىزدەۋگە جانە ونى الماتىعا جەتكىزۋ تۋرالى كەلىسسوزدەرگە ەكى جارىم جىلعا جۋىق ۋاقىت كەتتى. اقىرى اق كىرەكەيدى تەگىن الدىق. قازىر شۆەتسيا حايۋاناتتار باعىنىڭ بىرىمەن پۋرگامىزدىڭ جۇبىن اكەلۋ ءۇشىن كەلىسسوزدەر جۇرگىزىپ جاتىرمىز»، باسقارما باسشىسى.
سونىمەن قاتار، ول پاشا ەسىمدى ەركەك شيمپانزە بىلتىر لولا اتتى جۇبىن تاپقانىن اتاپ ءوتتى.
«ول دا پۋرگۋ سياقتى ماسكەۋدەن جەتكىزىلدى. العاشىندا مايمىلدار بولەك ءومىر ءسۇرىپ، ءبىر- ءبىرىن سىرتتان باقىلاپ ءجۇردى. قازىر ولار ءبىر-بىرىنە ۇيرەنىپ، دوس بولدى. ءدال وسىنداي ۋرمان جولبارىسىنا ۇرعاشىسى تاڭدالدى. سونىمەن قاتار، حايۋاناتتار باعى گرانت زەبرالارىمەن تولىقتى، ولار ءپىل، سۋ سيىر جانە بوكەندەرمەن بىرگە 2024 -جىلدىڭ سوڭىندا قۇرىلىسى باستالاتىن «افريكا ساۆانناسىن» مەكەندەيتىن بولادى»،-دەدى عاني مايلىبايەۆ.
