الماتى پوليسياسى جۇرگىزۋشىلەرگە ەسكەرتۋ جاسادى

الماتى. kazіnform - الماتى پوليتسياسى جۇرگىزۋشىلەردەن كولىكتەرىن تەك بەلگىلەنگەن جەرگە قويۋعا شاقىردى.

كولىك قۇرالدارىنىڭ قوزعالىسىنا قولايلى جاعداي جاساۋ ءۇشىن جاۋىن-شاشىن كەزەڭىندە كوشەلەردى ۋاقتىلى تازالاۋ قاجەت، بۇل جول قوزعالىسى قاۋىپسىزدىگىن قامتاماسىز ەتۋدىڭ ماڭىزدى اسپەكتىسى.

- پوليسيانىڭ بۇل ۇندەۋى اۋا رايىنىڭ جانە قالاداعى جول قوزعالىسى جاعدايىنىڭ ناشارلاۋىنا بايلانىستى جاسالدى. قالا كوشەلەرىنە كوپتەگەن كوممۋنالدىق كولىك شىققانى بەلگىلى. كولىكتەردىڭ دۇرىس قويىلماۋىنان كەي جەرلەردە قار شىعارۋ جانە جولدى تازالاۋ ايتارلىقتاي قيىندىق تۋعىزىپ جاتىر. كەڭسەلەر مەن مەكەمەلەر كوپ شوعىرلانعان جەرلەردە ازاماتتار جول ەرەجەسىن ەلەمەي، كولىكتەرىن رەتسىز قويادى. بىرىنشىدەن، زاڭبۇزۋشىلىق بار. ال، ەكىنشىدەن، بۇل قار تازالايتىن تەحنيكاعا بەلگىلى ءبىر قولايسىزدىقتار تۋعىزادى. وسىعان بايلانىستى كولىك يەلەرىنە ۇندەۋ جاساپ، كولىك تۇراعى ماسەلەسىنە ۇلكەن جاۋاپكەرشىلىكپەن قاراۋعا شاقىرامىز، - دەدى الماتى قالالىق پ د جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.

سپيكەردىڭ سوزىنشە، شاھار كوشەلەرىن 150 گە جۋىق پاترۋلدىك پوليتسيا جاساعى مەن اكىمشىلىك پوليسيانىڭ مامانداندىرىلعان باتالونى كۇزەتەدى. جول اپاتتارىنىڭ الدىن الۋ جانە جالپى جول جاعدايىن تۇراقتاندىرۋ ءۇشىن بارلىق قاجەتتى شارالار قابىلداندى. وسىعان بايلانىستى جول قوزعالىسىن باقىلايتىن پاترۋلدىك پوليتسيا بولىمشەلەرىنىڭ سانى ارتتىرىلدى.

- قىستا كولىك جۇرگىزۋدە بەلگىلى ءبىر قيىندىقتار تۋىندايدى. سوندىقتان جۇرگىزۋشىلەردى اسا ساق بولۋعا، جىلدامدىقتى شەكتەن اسىرماۋعا، تەجەگىش پەدالىن قاتتى باسپاۋعا، ەڭ باستىسى، ورىندالاتىن مانيەۆر تۋرالى باسقا جول قوزعالىسىنا قاتىسۋشىلاردى الدىن الا ەسكەرتۋگە شاقىرامىز. جولدارداعى قاۋىپ-قاتەر تۋرالى ەسكەرتەمىز جانە جۇرگىزۋشىلەر مەن جاياۋ جۇرگىنشىلەردى جول قوزعالىسى ەرەجەلەرىن قاتاڭ ساقتاۋدى، ءوز ومىرلەرىن، سونداي-اق باسقا دا جول قوزعالىسىنا قاتىسۋشىلاردىڭ ومىرىنە قاۋىپ توندىرمەۋدى سۇرايمىز، - دەدى ول.

وسىعان دەيىن مەگاپوليس كوشەلەرىن تازالاۋعا مىڭنان استام جول جۇمىسشىسى مەن 475 تەحنيكا قار تازالاۋعا جۇمىلدىرىلعانى تۋرالى جازعان ەدىك.

سونداي-اق اۋا رايىنا بايلانىستى الماتى حالىقارالىق اۋەجايىندا ءبىرقاتار رەيس كەشىگىپ ۇشاتىنى تۋرالى ايتقان بولاتىنبىز.