الماتى وبلىسىنىڭ تۇرعىنى ءتىرى مالدى ولەكسەلەردىڭ ىشىندە ۇستاعان
قونايەۆ. KAZINFORM - الماتى وبلىسى قاراساي اۋدانى قىرعاۋىلدى اۋىلىنىڭ تۇرعىندارى مالدىڭ ولەكسەسىن قوراسىنان شىعارماي وتىرعان ءۇي يەسىنە شاعىمداندى.
ونىڭ ۆيدەوسى الەۋمەتتىك جەلىدە تارادى. بەينەجازبادان ۇلكەن اشىق قورادا جىلقى، شوشقا مالدارى ارالاس جاتىر. مۇندا ولەكسەلەردەن بولەك، بالشىققا باتىپ، ارەڭ قوزعالىپ جاتقان ءۇي جانۋارلارىن كورۋگە بولادى.
«قىرعاۋىلدى اۋىلىندا سۇمدىق جاعداي. جىلقىلار مەن شوشقالار ولەكسەنىڭ جانىندا ۇستاپ وتىر. كوپ جىلدان بەرى وسى ماسەلە شەشىلمەي كەلەدى. دالىرەك ايتقاندا، ءبىز ول تۋرالى بۇگىن عانا بىلدىك. ءبىز جاعىمسىز ءيىس بۇل جەر لاس بولعاندىقتان شىعادى دەپ ويلادىق. الايدا ول ولەكسەنىڭ ءيىسى ەكەن. وسىعان شارا قولدانۋىن سۇرايمىز»، - دەلىنگەن جازبادا.
اتالعان جاعدايعا قاتىستى الماتى وبلىسىنىڭ اكىمدىگى تۇسىنىك بەردى.
«كوشە تۇرعىندارىنىڭ ارىز-شاعىمدارى بويىنشا قاراساي اۋداى اكىمىنىڭ ورىنباسارى مال يەسىمەن اڭگىمەلەستى. ناتيجەسىندە شوشقا مەن جىلقى ساتۋ تۋرالى كەلىسىمگە قول جەتكىزىلدى. 4-مامىردان باستاپ وكتاۆا باسپاناسىنا تىركەلمەگەن 26 شوشقانى ۋاقىتشا ورنالاستىرۋ تۋرالى كەلىسىم جاسالدى. باسپانادا ۆەتەرينارلىق ساراپتاما جانە جانۋارلار كارانتينى جۇرگىزىلەدى، جىلقىلار تاسىمالدانادى. جاعداي اۋىلدىق وكرۋگ اكىمىنىڭ، پوليتسيا مەن ۆەتەرينارلىق پۋنكتىڭ باقىلاۋىندا. اۋدان اكىمدىگى تاراپىنان كولىك ماسەلەسى شەشىلدى»، - دەپ اتاپ ءوتتى الماتى وبلىسىنىڭ اكىمدىگىنەن.
جانۋارلاردىڭ يەسى - قىرعاۋىلدى اۋىلىنىڭ تۇرعىنى الەكسەي ەسىمدى ازامات.
«بۇل وتباسى وسىنداي جاعدايعا قاتىستى 2022 -جىلى ايىپپۇل ارقالاعان. 2023 -جىلى 10 باس جانۋاردى ۆەتەرينارلىق ستانسياعا تىركەتكەن. بۇگىنگى جاعداي ءبىزدىڭ مەكەمەنىڭ باقىلاۋىندا. قورادا مەحانيكالىق جانە بىرنەشە ديزەنفەكسيالىق تازارتۋلار جۇرگىزىلەدى»، - دەپ مالىمدەدى قاراساي اۋداندىق ۆەتستانسيانىڭ وكىلى.
ال رايىمبەك اۋىلدىق وكرۋگىنىڭ اكىمدىگى جانۋارلاردىڭ يەسى سانيتارلىق تالاپقا باعىنباي كەلە جاتقانىنا 10 جىلدان اسقانىن ايتتى. اراسىندا ايىپپۇل تولەگەن. اۋىلداستارىنىڭ شاعىمدانۋى ءبىرىنشى رەت ەمەس.
اۆتور
الما مۇقانوۆا
