الماتى وبلىسىنىڭ ءتورت تۇرعىنىنان ءسىبىر جاراسى انىقتالدى
قونايەۆ. KAZINFORM - الماتى وبلىسى ۇيعىر اۋدانىنا قاراستى ۇلكەن اقسۋ اۋىلدىق وكرۋگىندە ءسىبىر جاراسىنا كۇدىكتى ءتورت جاعداي تىركەلدى. بۇل تۋرالى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى ءمالىم ەتتى.
الماتى وبلىسى دەنساۋلىق ساقتاۋ باسقارماسىنىڭ باسشىسى المات تۇرىسبەك ۇلى اۋرۋدىڭ تەرى ءتۇرى ينفەكتسيانىڭ ەڭ كەڭ تارالعان ءتۇرى ەكەنىن جانە ۋاقتىلى ەمدەۋ كەزىندە قالپىنا كەلۋ مۇمكىندىگىنىڭ جوعارى ەكەنىن اتاپ ءوتتى.
بارلىق پاتسيەنتتەردىڭ جاعدايى اۋىرلىقتىڭ ورتاشا دارەجەسىندە دەپ باعالانۋدا.
«ءسىبىر جاراسى ادامنان ادامعا جۇقپايدى. ينفەكتسيانىڭ نەگىزگى كوزى - ءىرى قارا مال، جىلقى، قوي، ەشكى. ءسىبىر جاراسىنىڭ قوزدىرعىشى ادام ورگانيزمىنە، نەگىزىنەن، زاقىمدالعان تەرى ارقىلى، سيرەك جاعدايدا - تىنىس الۋ جولدارى مەن اسقازان- ىشەك جولدارىنىڭ شىرىشتى قاباتتارى ارقىلى ەنەدى. ينكۋباتسيالىق كەزەڭ (جۇقتىرۋ ساتىنەن باستاپ اۋرۋدىڭ بەلگىلەرى پايدا بولعانعا دەيىنگى ۋاقىت) 2 كۇننەن 14 كۇنگە دەيىن»، - دەدى ول.
الماتى وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى مارات يسمايلوۆ ينفەكسيانى جۇقتىرۋ قاۋپى بار ادامدار توبى انىقتالعانىن ايتتى. ولاردىڭ بارلىعى مەديتسينالىق باقىلاۋعا الىنعان.
جەرگىلىكتى اتقارۋشى ورگاندار جەدەل شتاب قۇرىپ، جاعدايدى باقىلاۋدى جانە قاداعالاۋدى كۇشەيتتى. اۋداندىق پوليتسيا ءبولىمى ەتتى جانە مالدى اۋداننان تىس جەرلەرگە اكەتۋگە جانە باسقا اۋدانداردان اكەلۋگە شەكتەۋ ەنگىزدى.
قازاقستان رەسپۋبليكاسى اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ الماتى وبلىسى بويىنشا اۋماقتىق ينسپەكتسياسىنان اتاپ وتكەندەي، مال ۆەتەرينارلىق قىزمەتكە حابارلاماستان سويىلعان.
«اۋرۋدىڭ ناقتى سەبەپتەرىن انىقتاۋ ءۇشىن ۆەتەريناريالىق ينسپەكتسيا سانيتاريالىق- ەپيدەميولوگيالىق باقىلاۋ جانە پوليتسيا دەپارتامەنتىمەن جانە وبلىس اكىمدىگىمەن بىرلەسىپ ناۋقاستاردىڭ ۇيلەرىنەن سويىلعان مالدىڭ شيكىزاتى مەن ونىمدەرىنەن، سونداي-اق سويۋ ورنىنداعى توپىراقتان سىنامالار الدى. باكتەريولوگيالىق زەرتتەۋلەردىڭ ناتيجەلەرى جاقىن ارادا دايىن بولادى دەپ كۇتىلۋدە. سونىمەن قاتار، تالداۋ ءۇشىن ماتەريالدار الماتى قالاسىنداعى ۆەتەريناريا جونىندەگى ۇلتتىق رەفەرەنتتىك ورتالىققا جىبەرىلدى»، - دەلىنگەن حابارلامادا.
قازىرگى ۋاقىتتا ەلدىمەكەندە دەزينفەكتسيالاۋ جۇمىستارى جۇرگىزىلدى، ناۋقاستاردىڭ جەكە شارۋاشىلىقتارى كارانتينگە جابىلدى.
ماماندار جانۋارلاردى كۇندەلىكتى تەكسەرۋدەن وتكىزۋدە، ازىرگە اۋرۋدىڭ كلينيكالىق بەلگىلەرى انىقتالعان جوق.
