الماتى وبلىسىندا قار كوشكىنى وبلىستىق ماڭىزى بار جولدى جاۋىپ قالدى
قونايەۆ. KAZINFORM - الماتى وبلىسى ەڭبەكشى قازاق اۋدانىنىڭ اۋماعىندا قار كوشكىنى ءجۇردى.
الماتى وبلىسى ت ج د مالىمەتىنشە، بۇگىن ساعات 06:05-تە وبلىستىق ماڭىزى بار «تۇرگەن - باتان» اۆتوجولىنىڭ 22 جانە 23-شاقىرىمى اراسىندا قار كوشكىنى ءجۇردى. كولەمى - 200 تەكشە مەتر. كوشكىن سالدارىنان زارداپ شەككەندەر جوق.
- تۇرگەن وزەنىنىڭ ارناسىندا سۋ ەركىن ءوتىپ تۇر. جاعدايدى باعالاۋ جانە جولدى تازارتۋ ءۇشىن الماتى وبلىسى توتەنشە جاعدايلار دەپارتامەنتىنىڭ 2 قىزمەتكەرى مەن 1 تەحنيكاسى، «قازسەلدەنقورعاۋ» مەكەمەسىنىڭ 2 مامانى مەن 1 تەحنيكاسى جىبەرىلدى. قازىرگى ۋاقىتتا جولدى تازارتۋ جۇمىستارى جۇرگىزىلىپ جاتىر. جۇرگىزۋشىلەرگە جاعدايدى ەسكەرىپ، كورسەتىلگەن مارشرۋت بويىنشا جۇرۋدەن ۋاقىتشا باس تارتۋ ۇسىنىلادى، - دەپ حابارلادى وبلىستىق ت ج د.
ەسكە سالايىق، بىرنەشە كۇن بۇرىن الماتى وبلىسىنىڭ تاۋلارىندا قار كوشكىنى جۇرگەنىن جازعانبىز.
سونداي-اق شىمبۇلاقتا شاڭعىشىلار كەسىرىنەن قار كوشكىنى جۇرگەن بولاتىن.
